تشاهد الأن جميع تدوينات شهر 2011. إظهار كافة الرسائل

إقرا الثورة

تعليق واحد10:11 م, بواسطة المحروسة

هيكتبوا ف كتب التاريخ
إن الشباب نزلوا الميدان
عدلوا اللي مايل من زمان
رجعوا الشعب الغريق
يحضن الشط ف أمان
بس النهارده.. إحنا المسيخ 


وهيكتبوا ف كتب الحساب
إن الدولار كان حار ونار
والفلاحين شحتوا الخضار
قام الشباب زي الحريق
طهروها بقت عمار
بس النهاردة.. إحنا الكلاب 

وهيكتبوا ف كتب الحقوق
المصري كان معجون هموم
ولحمُه أرخص م الهدوم
قام الشباب فرشو الطريق
وقالو عمر الظلم يوم
بس النهارده..نلبس خازوق 


وهيكتبوا ف كتب اللغات
الصمت كان لغة البلاد
قدر على لسان العباد
بس الشباب نزلت زعيق
زي الوليد لحظة ميلاد
حيوا الكلام بعد اما مات 


وهيرسمونا قديسين
والشهدا يبقالهم مقام
والطلبة ييجوا مبهورين
يقروا على قبورنا السلام
وهيحكوا عن روح الفريق
ويخلّصوا فينا الكلام
وهيلعنوا أحمد شفيق
ويقولوا ع المجلس لئام
بس النهارده.. مُحرِّضِين

صحصح

أضف تعليق9:33 ص, بواسطة المحروسة

إصحى يا نايم
النظام قايم
إصحى يا نعسان
للمشير وعنان
إصحى يا دولة
قولي للملّا
الكرامة قرار

إصحى يا متوول
جاي عليك الغول
إصحى يا كسلان
شوف كلام عتمان
إصحى يا مكفي
الشيطان مخفي
والوزارة ستار

إصحى يا ثاير
البعيد فاير
إصحى يا مصري
واجري على نصري
إصحي يا أمّه
وارفعي الغُمَّه
ثُوري يا دولة
والفقير أَوْلى
إصحوا يا ثوار

إصحِي يا بلدنا
قوموا يا ولادنا
كونوا م الأحرار

جناح الهوى

تعليق واحد10:32 م, بواسطة المحروسة




حنيني إليك أيقظني
كعهدك تهوى إيقاظي
أما يكفيك من فجري
أقوم بغير إيعازِ 

يغار الصبر من صبري
وتعجب لي عزائمه
قيام الليل شوّقني
عزمت نهاري صائمه 

إذا أسلمت لك جنبي
تهيمُ الروح تلقاك
جناحٌ أثقله ذنبي
جناحٌ خفَّ بهواك 

أذوب كأنما قد فزت
بلحظٍ من مُحيّاكَ
أتوب وفي الهوى ما تبت
حياتي أنّي أحياكَ

إلزم فؤادك

تعليق واحد10:12 ص, بواسطة المحروسة


إياك والمختال زهواً إنه إن زدته وصلا جفاك 
يخفي هواه تمنعاً وجفاه أفضح من هواك

ودعك من حب اللئيم وخلِّه
 ففراقه ترياق لدغة وصلِهِ

واصرف فؤادك عن فؤادٍ بينَ بينْ
ءأنت تستجدِ النوائب ثم تبكي إن أتين

وعِف قلبك عن غرامٍ ليس لك
وانأَ بقلبك عن وصالٍ فيه شك

والزم حبيباً اشتراك بصبره
وامتحنه بسره وبجهره

إن الهوى من بعض حلوه مُرُّهُ
ومن اعوجاج الضلع يصعب كسرُهُ


طائف الليل

أضف تعليق9:14 م, بواسطة المحروسة



يا إلهي غرني منك السماح
فارحم القلب الذي بالذنب باح
يا إلهي جرَّأَ القلب الترجي
نجِّني من جرأتي أنت المنجي

سيّدي من يشتري منِّي الهوى
جفَّ الغرام وعَفّ قلبي واكتفى
أَوَبَعد حب الله حباً يُبتغَى
أَوَيبْغ مَن ذاق الرُّطَب سقْطَ النَوَى

مر بي ب الليل طائف
من هواك
قال قلبي لست خائف
من لقاك
لكنني خجلى ووجلى
من ذنوبي
همَسَ في أذني حبيبي..
فلتتوبي

يا عالماً بالسرِّ أنت السر منِّي
أنت الرجا يا رجائي والتمني
ما الذنب إلا لهفة للعفو منك
لذة العفو تغري بالتجني

عظَّمت ذنبي
فجئت أطرق خير باب
من غير ربي
يبدل الذنب الثواب

إمتى؟

أضف تعليق8:43 م, بواسطة المحروسة


وإمتى يا بلدي أشوفك بجد
 لا معانده نفسك ولا ظالمة حد

وإمتى تحن القلوب ع القلوب
يا خَلْق مدارية في صدورها طوب

أشوفك عزيزة أشوفك قوية
أشوفك ب تدِّي لاخويا وليَّا

ومشوفش رشوة ومشوفش خيبة
ومشوفش شايب بيترجَّى عيبَة

أشوف الغلابة بتاكل فراخ
واشوف الحرامي يسِف السباخ

أشوفك صريحة وجيالنا دوغري
ومشوفش عيِّل ينام تحت كوبري

واشوف البنات الذوات في الملاجىء
واشوف الولاد الشداد في الخنادق

أشوفك مصانع بتنتِج رجال
 أشوفك مَزارع وفايضه الغلال

أشوفَك بترجع ل عِشَّك يا طير
تعيشي يا بلدي واشوفك ب خير







حرارة

أضف تعليق4:53 ص, بواسطة المحروسة

أحمد علي والشهرة حرارة
واحد من أهل التحرير
عين اداها لمصر شرارة
والتانية عشان التغيير

أحمد علي والشهرة حرارة
لا هو بلطجي ولا وش مشاكل
كل ما فيها عنده مرارة
تحرقه لو حقك يتاكل

أحمد علي والشهرة حرارة
لا هو قابض ولا شاب أجندة
ثار على دولة شيخ الحارة
اللي بيشرب دمك فِردَة

أحمد علي والشهرة حرارة
م القلة الطاهرة المندسة
بُكره يجاهد ب النضّارة
وانت مفتّح ليه بلا وكسة

حارة سد

8 تعليق8:41 م, بواسطة المحروسة

زنقة ف حارة
وصوت صفارة
 وواد ب يغنّي وصوته نشاز
تيتو حماده
أخدله شهادة
وكلمة فضحكه خطوبة جواز
تاكس وظيفة
 ولقمة نضيفة
وعركة على بومبة بوتاجاز

ست أمينه
بايته حزينه
جايبه الدوا باربع تقساط
وبنتها سلمى
عندها أزما
ولزمن هيجيبوا الشفاط
إبن قطاطه
شاب ألاطه
بس غباؤه يجيب إحباط

هي البصه
ف أول فرصة
جاب الشبكة والطلبات
ناس وكراسي
عصير ب شماسي
والأمنا عاملين ظباط
وزيطة وفرقة
وسلمى بحرقه
بتبوس صورة ونازله عياط

خناقة

أضف تعليق8:02 م, بواسطة المحروسة

♫ أنا لو اعرف اقول 
 ♫ وهخبي انا ليه 
♫ ما عنديش سر أداري عليه ♫
 بتغير على طول ♫
 بتغير من إيه ♫
  إفتح محضر يا سعادة البيه ♫

 مين دول ع الفيس؟ ♫ 
 ♫ مين ده اللي اتآد؟ ♫ 
 ♫ بطَّل تغليس ♫ 
 ♫ وكلام متعاد ♫
 ♫ دمِّك شربات ♫
  كفاياكي هزار ♫
 ♫ ممنوع الشات ♫
  هتخشي النار ♫
 ♫ هشيل النت 
 ♫ يا لهوي يا هوه 
♫ نافوخي ها يشِت ♫ 
 ♫ النبي تحوشوه ♫

♫ طاب هاتي الباس 
♫ لا جديدة كمان ♫ 
♫ طاب هات باسووردك إنت كمان ♫
 إلحقني يا قاضي النت قوام ♫ 
 ♫ الراجل جاله فمخه سبام ♫

ما تيجي

3 تعليق6:25 م, بواسطة المحروسة

ما تيجي يا مصر اغنّيلِك
تنامي الليلة على كَفِّي
وازوَّق في المَسَا نيلِك 
تقومي الصبح تتزفِّي ‎

ما تيجي يا مصر أحكيِلك
وانا بعْقُدلك الطَّرحَه
واشْبُكلِك ف منديلك
حكاوي م الميدان صابحة ‎

أحكيلك على الطلبة
وع الفلاح ابو مشنّه؟
ولّا ع اللي في الغربة
وقلبه في الميدان غنّى؟

أحكيلك على القمرات؟
ولّا يا مصر بتغِيري؟
زهدوا الحب والسهرات
وواقفين سَدّ لابو ميري ‎

أحَنِّي شَعْرِك المفرود
على كتافي
بلون دَمِّي؟
ولّا يا مصر بتخافي؟
أداري جرحنا ب كمي ‎؟

أقيد الشمع على بابك؟
وانادي الخَلْق تتفرج؟
ولّا هتكْسِفِي شبابِك
تقولي عيال وبنهرَّج؟

أضفّر همّي في ضفايرك؟
واغسل بالدموع توبك
ويطلع فَجري على فَجرك
يلاقي غيري محبوبِك؟

ما تيجي يا مصر ترتاحي
وتِرْخِي الجِفن على خَدِّي
تنامي وابات انا صاحي
نصيبي وقسمتي ووعدي

ويِنْزِل دمعي يرويكي
ينبِّت حِلم في عنيكي
تقومي الصبح تلقيني
بَحُط العمر في إديكي
واقول لك بردو يبقالِك
ما تيجي يا مصر اقولهالِك..
بحبِّك.. شوفي هتكفّي..؟‎





اللي بنى مصر

أضف تعليق6:15 م, بواسطة المحروسة


اللي بنى مصر
كان في الأصل
مش لاقي

رمى الخيام في الطل
وقال للدهر
انا باقي

سقت دموعه الليل
اتشق نهر النيل
ما بين ساقي
****
اللي بناني لا كان
عالم ولا فنان
اللي بناني زمان
فلاح مالوش تاني

الواد طلعش لابوه
اتبرّا م اللي جابوه
وقال حلواني!
****
من فات قديمه يتوه
والخلق يشتغلوه
يا حسرة يا سواقي

ثقافة اليوتيوب

تعليقان4:11 ص, بواسطة المحروسة


أحد أعضاء حزب الكنبة فرجني فيديو على اليوتيوب يكرَّه أي آدمي في الثورة والثوار.. الثوار كلهم في الفيديو بيسكروا ويعربدوا .. الفيديوهات كلها مافيهاش ولا فيديو في الميدان.. رديت عليه بهدوء لا دول كل الثوار ولا تصرفات الثوار خارج الشأن السياسي تعنيني..  نفسي الناس تفهم إن الثوار بشر عاديين.. لو واحد بيشرب خمرة الثورة مش هتغيَّره.. لا ده دور الثورة ولا حتى متوقع منها.. دي ثورة على الظلم والفساد قام بها كل من يشعر بهذا الظلم.. يعني المدمنين اللي أدمنوا نتيجة تساهل الدولة مع المهربين والمروجين.. ما يثوروش؟ البلطجي اللي نفسه يتوب ومش عارف عشان الباشا بيحتاجه مرة مرشد ومرة ناضورجي انتخابات.. ما يثورش؟ الشاب الملحد اللي مالوش في حياته أي اهتمام ديني إنما بلده هي شغله الشاغل.. ما يثورش؟ نمنع الناس تثور عشان أخلاقها لا تتفق وأخلاق الميدان؟؟؟


 ولا ينفع نتخيل إن الملايين اللي بتنزل دي كلها مسلمين ومسيحيين أفاضل.. ملايين البشر يعني بشر..ثورة شعبية يا أفاضل.. يعني صورة من المجتمع فيها كل ما فيه من ظواهر وآفات.. ناس تعيب على هتاف بذيء!! الشعب فيه طبقات كاملة دي لغتها.. هنوقف واحد بخرزانه يلسوع اللي يهتفوا هتاف بذيء! أعتقد لو كان فيه يوتيوب أيام حرب الاستنزاف أظن كان زمننا فضحنا الظباط الأبطال اللي ع الجبهة بكام فيديو خايب يجيبوا كام ظابط بيهزروا هزار أبيح والا مهربين خمرة للمعسكر وبيشربوا.. والا بيحششوا حتى.

صديقة أرسلت لي فيديو به شيخ بلحية كثيفة بيقول كلام ما أنزل الله به من سلطان وبيتشنج ويزعق بطريقة تبغض أي مخلوق في الإسلام.. وتخوف أي عصفور على شجرة بطاقته مش مكتوب فيها "الديانة: مسلم والنيعمه" من مستقبله لو الإسلاميين خدوا الحكم.

صديقة أخرى أرسلت لي فيديو به تسجيل لقناة مسيحية والمذيع بيقول كلام يحرق الدم والجلد والشعر.
المتطرف هو اللي بيقول كلام متطرف والا المتطرف هو كمان اللي بيروج قصاقيص المتطرفين ويزود العداوات بقصد أو بغير قصد.
اللي عايز يتعرف على الآخر ما يتصيدش فيديوهات تشوه الآخر ويتعرف عليه منها.. ما ينفعش تكون قناعة مسبقة ثم تبحث فقط عما يعزز هذه القناعة لتشاهده وتروج له.

اليوتيوب نعمة واكتشاف رائع.. لكنه ليس مصدرا صحيا للمعلومات.. اليوتيوب بيعرض كليب وكليب بالمعنى الحرفي يعني "قصقوصة" ما ينفعش تاخد قصاقيص وتكون منها رأي.. ما ينفعش تاخد قصاقيص وتبني عليها حكم.. ما ينفعش ثقافتك تبقى نتاج قصاقيص الغير.


هتافات جديدة من أجل جمعة تسليم السلطة

أضف تعليق4:24 م, بواسطة المحروسة


 المحروسة_مروة مأمون 

‏ ‎‏ طنطاوي نايم مش داري ~ وأمن الدولة رجع متداري
 المحروسة_مروة مأمون 

‏ ‎‏ المجلس قابض وعميل ~ ويقول عالثوار دلاديل ~ المجلس دلدول أمريكا ~ ومسمي العمولات بولوتيكا
 المحروسة_مروة مأمون 

‏ ‎‏ المجلس عملاء وفلول ~ والشعب الغلبان مسحول
 المحروسة_مروة مأمون 

‏ ‎‏ عسكر تاني طيب ليه؟ ~ ما بنزهقش والا إيه؟
 المحروسة_مروة مأمون 

‏ ‎‏ نفسك تحكم مصر يا جيش؟ ~ كان على عيني بس مفيش
 المحروسة_مروة مأمون 

‏ ‎‏ يا طنطاوي يا عنان ~ انتو غلطتو في العنوان
 المحروسة_مروة مأمون 

‏ ‎‏ مجلس وطني يحمي اخواته ~ والعسكر يرجع ثكناته
 المحروسة_مروة مأمون 

@‏ ‎‏ يا طنطاوي لو تعبان ~ إحنا هانحكم مالميدان
10 hours ago                                          ‏ ‎‏ يا طنطاوي لو تعبان ~ إحنا هانحكم مالميدان
 المحروسة_مروة مأمون 

‏ ‎‏ يا مشير يا مشير ~ الشهدا رجعوا التحرير
 المحروسة_مروة مأمون 

‏ ‎‏ يا منصور هات القناصة ~ لسه فجسمي مكان لرصاصة
 المحروسة_مروة مأمون 

‏ ‎‏ مش هايفيدك غاز ورصاص ~ حكم العسكر بِخ خلاص
 المحروسة_مروة مأمون 

‏ ‎‏ يلبس مدني يقلع ملط ~ إحنا وصلنا لآخر الخط
 المحروسة_مروة مأمون 

‏ ‎‏ مجلس وطني حقوق إنسان ~ المصري كريم ولا ينهان
 المحروسة_مروة مأمون 

‏ ‎‏ مجلس وطني يعني أمان ~ يعني الظابط مش سجّان
 المحروسة_مروة مأمون 

‏ ‎‏ مجلس وطني يعني عدالة ~ وفلوس في الإيد الشغالة
 المحروسة_مروة مأمون 

‏ ‎‏ ثورة ثورة ثورة ثورة ~ مجلس ثوري جديد من بكرة
 المحروسة_مروة مأمون 

‏ ‎‏ مش ها نسلم مش هانبيع ~ مش هانوافق عالتمييع
 المحروسة_مروة مأمون 

العسكر هم الحرامية ~ والجيش أوسخ مالداخلية ‎‏ ‎‏‏
 المحروسة_مروة مأمون 

‏ ‎‏ يا طنطاوي قول لعنان ~ الشرعية للميدان
»
 المحروسة_مروة مأمون 

‏ ‎‏ كله أونطه كله أونطه ~ المطلوب تسليم السلطة