هزرعها قمح ودره
وافوتها مخضَّرة
بيع المحصول يا حافي
وهاتلك كنتره
بلدي اللي انا أولى بيها
هاسيبها باللي فيها
واهو اللي شفته كافي
ويطفش عنتره
نيلها بعته في إزازة
ونخيلها مالوهش عازه
وان كان رأيك خلافي
شيلها يا سكره
جرب تعشقها موت
تندهها ملكش صوت
تكتب تهري القوافي
ولا هيَّ مْعَبَّرة
ولذا يابن الخواجه
ما عادليش فيها حاجه
هبيع لحمة كتافي
بحزمة كسبره
ماهو لاخضر لُه فوايد
وان شِلته لُه عوايد
ولقولِة لأ شافي
فحيوا الأخضرا
قرب جرب وشوف
بقه كله ع المكشوف
ببيع طُهري وعفافي
صحصح يا اللي ورا
على مهلك يابن عمي
يا عم دي طرحِة امي
دي سُتره وضِل دافي
ماهيش متسعرة
نزل إيدك يا صايع
دي خلق مهيش بضايع
سِكَك تطرح عطافي
وبيوت متنطورة
ما تجيش جنب الجوامع
ماتقلبش المواجع
مدنِة سيدي الكفافي
خليها منورة
بَقول لك إيه.. بناقص
بلاها البيعة خالص
واجبك معاك.. عوافي
والسكة معطرة
يادي القلب اللي ضايع
أنا رايح والا راجع
زيك يابلدنا ما في
ملعونة المشْوَرَة
هل تريد التعليق على التدوينة ؟