وانا مالي

أضف تعليق5:15 ص, بواسطة المحروسة



اللي يقول لك
انزل طالِب
نزِّل حاجب
وارفع حاجب
قول له انا مالي
انا مقضيها
أحايل فيها
سيبني يا عم أربي عيالي

واللي يقول لك دم الشهدا
قول له ياخي اهدا
شهيدنا اتهنا
ودخل الجنه
واحنا بندفع تمن الثورة
لعالم كفرة
وتمن الثورة لعلمك غالي
كل الحاجه بتغلى
الا احنا
سعرنا ف السوق عمال يرخص
يعني ملخص
لِم وقصقص
كل ما حد يقول لك اعمِل
اعمِل فيها عبيط واستهبل
تفضل بلدك زي ما هيَّ
واما تقوم الثورة الجايه
يرجع كل ولادك شهدا
تيجي يا عيني تقول للبعدا
يردوا بكل برود ياخي اهدا
شهيدنا اتهنا
ودخل الجنه
سيبنا يا عم نربي عيالنا

شفت ازاي الدنيا سهونّه
مهما تحاول تبقى ف حالك
غصب عنك انت ف حالي

تحرير الرسالة…

هل تريد التعليق على التدوينة ؟