حطه يا بطه

دبحنا القطه

وليلة الدخله
دخلنا بقرطه

الفرفور من خضته فرفر
مالحقش يشمر ويزفر

ومادام عرسان نشرط شارطه
تيجوا نعيد ترسيم الخارطه 

أمريكا أساسا على جنب
ولا تتعاشر ولا تتحب

واللي يقول لي دي دوله صديقه
يبقى بتاع لا مؤاخذه أونطه
خدلك مني بق حقيقة
شفتش صاحب
نازل لعب فمناخير صاحبه
ويقول له حملة تنضيف؟؟
شفتش صاحب قالل أدبه
وذالل صاحبه بنص رغيف؟
وان صاحبه اتدور يغتصبه
ويرجع يعمل فيها عفيف؟

أمريكا صاحبت صدام
نامت ويا مبارك نوم
أمريكا صنعت عزام
عشقت بن لادن بالكوم
نفسك لسه تصاحب دولة
حبايبها مصيرهم محتوم

يبقى أليسطه
هاتسيبك بقى من أمريكا
وحضَّن على قارة أفريكا
وامسحلي حدود أرض النوبه
من امتى بيفصلنا خطوط
الحسبة قصادك محسوبة
تروي جدورك تقطع شوط

وطول ما كلامنا بلاش فبلاش
شيل لي إيلات دي ياعم الاسطى
واديها وش جديد كده لانج
سميها؟؟...امم..؟؟ أم الرشراش؟