لو فيها إسائة ذوق وبجاحه
انا لسه باقول موش مرتاحه
الحبس جميل
وبيشفي غليل
انما يتحاسبوا بقوانين متفصلة تفصيل؟
وازاي احاسبهم بعداله والباشا مدمر كل دليل
بقى بعد ما سبته ياكلها ويهضمها
ودخل التواليت قدام عيني
وراحت لمصيرها
اجي اقول له سرقت التفاحه؟
هايقول لي ما كلتش
وفتشني فتش
وايام الحبس هاتتقضى تأمل وسياحه
لسه هندوَّر وندعبِس
يلْبِس لَاحمر يعني هيلبِس
عندك 80 مليون شاهد وضحيه
ده كفايه عليه خنق الأحزاب والأمية
انما لسه هنطلب شهادات م الحراميه
انا عايزة محاكم ثورية
هاتقول لي هتاخد الصالح ف الطالح
ويقولوا على السكر مالح
مِش هم قضاة مصر الكُمَّل
يحكموا هم واحنا هنقبل
انما يتحاكم ع الجنايات ونسيب التهم السياسية
هي وسية؟
بلا دولة قوانين بلا مدنيه بلا وقاحه
ما حكمنا طوارىء 30 عام
يتحاكم بيها ونلغيها..
وده عدل العدل وأحلى كلام
وده عدل العدل وأحلى كلام
واعملي يا ام البعدا مناحه
هل تريد التعليق على التدوينة ؟