قُطُع الكلام

أضف تعليق6:27 م, بواسطة المحروسة



 قُطُع الكلام المستكين
اللي لا بيسد دين
ولا يحيي دين
ولا ينتفض للمدبوحين
قطع الكلام

قطع الكلام المايساويش
اللي يطبطب ما يداويش
حلاوة ما تأكلش عيش
تقرا مهما تقرا
برضو ماتلاقيش
قطع الكلام

قطع الكلام العنتري
اللي ما بيقطعش إيد المفتري
واللي ما بيقلبش جيب الفنجري
واللي مايعلمش غير على دفتري
 قطع الكلام

قطع الكلام الكستبان
اللي ما يهدش بيبان
يفتح قلوب الناس تبان
لو هايمسك في السطور
زي الجبان
قطع الكلام 

قطع الكلام الملطشه
اللي ما يلمش وديع ومدام رشا
واللي ما يخربش بيت قاضي ارتشى
لو ها يبقى شىء لزوم الفرفشه
قُطُع الكلام

قطع الكلام الأكلاشيه
حافضينه لما حلمنا بيه
حاجه كده زي البيديه
اتحدى واحد يكتشف
ده بيعمل ايه

قطع الكلام المبتذل
اللي لا يحرك جمل
ولا يهدي ظابط يشتغل
هو يعني انا مهما اقول
هاجي إيه فنجم وأمل
قطع الكلام

تعديل الرسالة…

هل تريد التعليق على التدوينة ؟