على ناصية بيت حماتي
واحده بتبيع خضار
لا بتفهم في السياسة
ولا جلسات الحوار
خضرا وِروِرها صابح
زاين وش المشنه
والخير من رزق بارح
بيريح تحت سنة
خضرا حسين الجبالي
ماتغشش في الميزان
بتقول مابليش عيالي
بقرش يودي اللومان
خضرا خضارها بأوان
على جية يناير
تيجي ريحة البشاير
تفحفح في الميدان
وتلاقي خضرا تضحك
لما تشوف حد لسه
ماشبعش بتنجان
الكوسه عند خضرا
ما بتعينش حد
والقرع بينطبخ
مابيخطبش ود
والسلق للقلقاس
مش للقوانين يا ناس
سألت خضرا مرة
عن الخيار الاستراتيجي
قالتلي ده أكيد من بره
نُص الخضار بقى من فيجي
جارة خضرا ام مينا
حجزوها فالاسبتاليا
مينا على حجر خضرا
بيرضع ويلاغينا
خضرا وست ام مينا
ما يعرفوش كاميليا
خضرا بكل احترام
أوعى من 100 نظام
ماتيجوا نقول لخضرا
تحكمنا والسلام
هل تريد التعليق على التدوينة ؟