إطفي النور

أضف تعليق12:59 م, بواسطة المحروسة



جرب مرة فعز الزحمة
تطفي النور
وحشه الضلمه؟
هاتضرب لخمه
وتجري ترَوَّح
والا انت أساسا مانزلتش؟


غمض عينك
وامشي مغمض
لما ماتبقاش عارف فينك
حاسس إنك أعمى ضعيف؟
نقطة ضعفك
عالم خاطفك
شِبه سعاده
شِبه سياده
عالم زيف
في التحرير الحق إرادة
في التحرير بيغني الشيخ
على لحن كفيف
النور يفرش


في التحرير الشهدا بتحيا
وترجع تهتف
وانت يا حي بإيه متكتف
في التحرير الدنيا رخيصه
أصلها بانت
لما انهانت
60 عام بلدك دي انخانت
ماللي بحب ترابها بيحلف
والا ماشفتش؟؟


في التحرير الدنيا رخيصه
ووسط الهيصه
الموت لابِد
قايم قاعد
بيخوفكوا
بس تناموا فحضن بيوتكوا
يبدأ هو ينقي وينتش
الكام شمعه اللي ما طفّوش
الكام روح اللي ما رخصوش
ولا حطوش عالوش وشوش
واللي بجد
يحوشوا جيوش
في التحرير الدنيا رخيصه
وعالم هيصه
وبنات حلوة
زي الغنوة 
اللي بتتفنش



في التحرير اتلمت دنيا
ما بتتلمش
واحد قيمة و كُول ونضيف

وواحد عمره بحق رغيف
وام شهيد وشها بيصلي
وهو بيحضن وش الضيف
في التحرير الدنيا ميدان
بس ما شفتش حد جبان
أصل الدنيا دي فيها وفيها
صنوف إنسان
وكلمة حق يا عم رويني
اللي اداك الكيف يديني
رحت ماشفتش حد محشش

تعديل الرسالة…

هل تريد التعليق على التدوينة ؟