أمن دولة

أضف تعليق1:27 م, بواسطة المحروسة



أمن دولة.. أمن دولة

كلمة حلوة
وحجه سهلة

انت بتصلي وبدقن
أمن دولة
انتو شلة روشة طحن
أمن دولة
انت بتحب الشيطان
أمن دولة
شيخ وبتعلي الأدان
أمن دولة
شلت عَلَمَكْ مرة ونزلت الميدان
دانت غاوي أمن دولة

انت بتفكر تفكر
أمن دولة
انت بتحاول تعبر
أمن دولة
طاب سافرت نجحت بره
وقلت ليه مارجعش اغير
انت فاكر السياسه دي لعبه سهلة؟
مش أصول تاخد موافقة أمن دولة؟

طاب يا ريته بحق فعلا أمن دولة
دالحشيش بقى خلاص زي اللبان
والبنات تتجاب دليفري
ولو تحب ولاد كمان
واهى تبقى حفله
والحقيقة الباقيه هيّ
إن أصل الكيف مناولة
واننا فدولة نظام
يعني دولة أمن دولة

إنما تقوللي الرغيف
والا فيه وزير موش نضيف
والا كام مليار يروحوا
تحت بند دهان رصيف
موش قضية أمن دولة
-------------------------------
أمن دولة؟؟
دول عصابة
دانت لو عندك يا والدي فِدْنْ أرض
ييجي واحد طول بعرض
وامضي يابا
لا تبقى ليلة وأمن دولة
 ------------------------------
رحت شرم الشيخ في رحلة؟
أمن دولة
انزل اتفتش بسرعه يا عم يلا

تبقى محتار انت واقف عالحدود
والا دي فعلا بلدنا
والكلاب عملا الصهاينه
وبئوا سينا تقولش دود

ألا هي صحيح بلدنا؟؟
والا ده سؤال أمن دولة
 ----------------------------------------

أمن دولة..أمن ريس
موش هاتفرق
هو يعني موش مواطن
وزي مانت فيه فبيتك
باب وعين.. قفل وجرس
هو فاكر مصر دي تكية ابوه
وعنده برضو باب حديد
طوله ألف دراع شديد
وعنده رجاله وحرس
وعنده بدل العين ألوف
شغلها تسهر تشوف
وأي حارس نفسه يدخل ع الملك
لا بد يعلن إنه شاف ع البعد نار
وانه واقف صاحي وحش.. ليل نهار
وبصراحة العيشه برة القصر تقرِف
ولجل ما يدخل ويغرف
ويقضي ليلتين في الدفا
لا بد يديك عالقفا
مانتا الجرس

وكلنا فنظر الجهاز
عملا للقاعده وشواذ
وكله عند الباشا متلفق وحصري
كنت مسلم كنت قبطي
كنت كافر والعياذ
انت مصري
وكل مصري
له ملف أمن دولة

آي قفايا
طاب سلام لانا جالي مشوار
أمن دولة
سيب دراعي انا قلت جايه
انت إيه يا بني آدم انت
أمن دولة؟

تعديل الرسالة…

هل تريد التعليق على التدوينة ؟