أنا الشعب

أضف تعليق12:53 ص, بواسطة المحروسة


أنا الشعب يا بهوات

بتتنطط على كتافي

جزمكم كلها ماركات
وانا حافي
وبتقولوا انكو لساني


أنا الشعب يا بشوات
إيه مالكم؟
خراطيمكم وعصيانكم
ووحشة ليل زنازنكم
ماهياش عاوزه تنساني؟

أنا الشعب يا قنوات
أرضيه وفضائيه
خِلَق قابضه ومنشيه
زكايب قاعده وبتفتي
وناس بيتاجروا بمصيبتي
وبالفُرقه اللي وكساني

أنا الشعب يا جاكيتات
عشان كرسي وعشان كنبه
بقيتوا ديوك وانا حلبه
يا صفوة مصر يا نخبه
يا فَرساني

أنا الشعب يا كبارات
سلام للعسكر الجالس
ابص فوشكم احتار
اشوف عمايلكو اقول حابس
اشوف حكوماتكو اقول لابس
سؤال من شعب متوغوش
لانتخابات ف سبتمبر
والا كلو في المشمش
وطلتكم مآنساني

أنا الشعب يا أغوات
ملوك سلاطين على رؤسا
هرسهم قطر مالبؤسا
مانا ببقى ساعات راكب
ساعات سايق بلا رخصه
لكني يا مصر في الغالب
ببات في محطة الفرصه
وفرصه جره فرصة تفوت
ولسّاني

أنا الشعب يا خواجات
أنا الموكوس أنا المكبي
يا استعمار بلا سرايات
بلا لمبي
منح ومعونه وابصر إيه
بليز أرجوكو سيلفوبليه

خلوا قرشكو فجيبكو
ما شفناش منه غير عيبكو
وألاعيبكو
وعهودكو اللي حبساني

أنا الشعب يا كروديات
يا فريدم ويا كارنجي
أنا القمحي أنا الأسمر
أنا الزنجي
كلامكم زيكم أصفر
كلامكم زيكم ملوي
وانا مفهمش غير بيرم
وحب السيد البدوي
حاجات بحتار في توصيفها
حاجات شبهي
حاببها عشق وعارفها
وارثها وهي ورثاني

أنا الشعب يا حضرات
أنا اللي مات
انا العايش
انا المتفات
على الهامش
بلِم فُتات
بقايا حق إنساني

تعديل الرسالة…

هل تريد التعليق على التدوينة ؟