دستور للبيع
قربي يا مدام
خد فكره يا بيه
ده جامد ومتين
دستور للبيع
متكلف وحياتك ملايين
ده شاريله بدال الذمه متين
كان عامله الراجل قد الواد
لبسوه جرابيع صبحم أسياد
ياخي قطعوا يا شيخ هم الاتنين
دستور ياهل الله
دستور ولا عادش لازمني يا ناس
وبابيعه ان شالله بربع جنيه
طاب خده واديلك بوسه فوقيه
طاب شوفي يا حاجّه
ده ييجي ميت ورقه
انشالله تقمعي باميه عليه
طاب بص يا باشا
لو عندك في البيت ست عفيه
سيبك مالطبطبه والمداديه
واحكمها بده وجرب أسبوع
هاتجيك مطاطيه
وهاتاكل من إيدها بغاشه
اسمع يا حماده
خد ده يا حبيبي اعمله صواريخ
وافشر في الفصل على اصحابك
قول بابي جابهولي من المريخ
طاب خده وعليه كرومبو زياده
ووقت ما تزهق
قول للداده
"يلقى في مزبلة التاريخ"
هلا فيك يالغالي
قرب تعالالي
خدلك دستور من عندي وقول
بركاتك ياللي أكيد داعيالي
وبدل ماتجيلنا وتتمشور
اقلب بلدك كباريه وطور
دستورنا فهز الوسط مثالي
دستور يا مواطن
مافيهوش ولا حق الا وله ماده عشان تلغيه
أَجَّرُه مالباطن
وعمل له يا ناس مجلس مخصوص
يبصمله عليه
دستور مافيهوش ليه أو لكن
وبموجب دستورنا الكائن
من حقه يولع فيك
من غير ما يقوللك ولع ليه
لو كنت ملك نفسك تحكم بلدك 100 عام
او واحد عادي وعنده زكام
آاتشوو
دستورنا جميل
ينفع كرباج ينفع منديل
لو كنت سمين أو كنت بكرش
خد نسخة بسرعه ماتترددش
داالحبه بقرش
واشتري عشره ووفر مليم
دستورنا يسد النفس تمام
ولا عمرك تحتاج أي ريجيم
شفتوش كده دستور في الدنيا
صدقتوا ان احنا صبرنا كتير
سبحانه القادر عالدساتير
باتت حركة صبحت ثورة كده هو فثانيه
وقادر ربي يكملها بخير
آسفين يا جماعه
الدستور ريحته خلاص فاحت
وايامه خلاص ولت.. راحت
مايصحش ابيعه...
"هذا الدستور قاتل وخطير"
هل تريد التعليق على التدوينة ؟