مطاعمنا مطاعم ثورية
والشيف مؤمن بالتغيير
طبق اليوم خلطته سرية
طبق اليوم مليان مقادير
ب يشٌر مجالس وطنيه
وسبعتاشر ألف وزير
واستلموا خلاص الورديه
والعِدَّه لب وطراطير
وريس وزرا يا كبدي وليّه
متجوز مجلس شرير
والمجلس زاد التحابيش
وبيسلُق قوانين قَمعيه
لا وبيصبَّع للحرافيش
ومحَمَّر عينُه الأمنيه
وبيحشيلنا دماغ الجيش
إشي جواسيس وأيادي خفيه
والجيش خايف م التفتيش
بيخبي قصايد ثوريه
تحت الكاب ويقول له يعيش
والإعلام بيرش الملح
حَبّه نفاق على حبِّةْ ردح
يلا يا مصري لقمه هنيه
طبقك جايلك ع التحرير
"عندك أوردر جوز حرية
متأخر وبقاله كتير"
شطبنا المطبخ يا عنيّا
الثورة الجايّه عليك خير
يا طعامة الثورة السلمية
تسلملي صوابعك يا مشير
تعليق واحد على { طبق اليوم }
20 نوفمبر 2011 في 5:20 ص [حذف]
تسلم إيديكي على الكلام ده !
هل تريد التعليق على التدوينة ؟