صوت الشتا

تعليقان12:36 م, بواسطة المحروسة


لما الشتا بيطُل
تلقى الشوارع فُل
ورق الشجر مغسول
وحَكَم الهوا ع الكل
يلبس ويبقى خجول

والشاي اهو ع النار
 واللمه بتدفِّي
بطاطا ولّا فشار
اهى لقمه وتكَفِّي

وحضن السما مفتوح
وعنيَّه غرقانه
أحكي لمين وأبوح
يا قلوب يا بردانه

وصوت المطر مزازيك
 بينادي على خِلُّه
يدق ع الشبابيك
ولا حد يفتحله

والشمس مكسوفه
بتداري في عيونها
بالغيمة ملفوفة
ولون كُحْلَها لونها

وكف الغريب دافي
يوعد وما يوَفِّيش
وعد الغريب حافي
لو مطَّرِت ما يجيش

تعديل الرسالة…

تعليقان على { صوت الشتا }

tarek alghnam يقول...
13 يناير 2012 في 10:41 م [حذف]

ماشاء الله مدونتك رائعه
تسلم ايدك

مذكرات حاحا مصر يقول...
16 يناير 2012 في 1:54 م [حذف]

كلامتك رائعة ومعبرة جدا واناياريت تبقي تزوريني في مدونتي وياريت تكتير من ابداعاتك لانها فعلا جميلة

هل تريد التعليق على التدوينة ؟