يا اللي زهدت العيش والفول
غزل البنات بالشوق مغزول
أزرق ولايق ع الأفارول
خد مني واحدة يا رب تنول
كل اللي في البال والنية
يا اللي مزاجك جايب جاز
الشاي ملهلب ع البوتاجاز
خد خمسيناية يا سي الأستاذ
وادعيلي دعوة منقيَّة
يا اللي صباحك قفا ليلك
سكَّر نباتنا يحلِّيلك
بُقَّك وشيله ف منديلَك
واعمل عزومِة عسليَّه
يا عريس وما لحقتش تفطر
بجنيه سوداني وخد قَشَّر
تصبيره للي هيتصبَّر
وخفيف كمان ع الميزانية
يا اللي انت نازل متسربع
هدِّي ونفَّع واستنفع
أي اصطباحه كده يا مجدع
مش راح تطير الوردية
يا اللي انت واقف بتبصبص
سخطوك يا شيخ ضفدع أخرس
لك قسمة يا بعيد تتجرَّس
علشان تحرَّم ملاغيَّه
هل تريد التعليق على التدوينة ؟