أنا مش عدد
أنا من يومين طفل اتولَد
أنا اللي راكب بسكليته
وابويا طاير م الفرح
أنا اللي بَظبُط في الجاكته
وامي خايفه لا اتحسَد
أنا مش رقم في كشوف غياب
أنا اللي بَتْعَلِّم على صوابعي الحساب
أنا اللي بيخبّي القصص جوّه الكتاب
أنا اللي أهلي شافوا علشاني العذاب
أنا مش عدد
أنا مش قضية وكلنا فلان الفلاني
أنا اللي جارتي من زمان مستنياني
أنجح واخلّص جامعتي وجيشي وجناني
واقول لابوها بحبها يا عمي اديهاني
أنا مش عدد
أنا مش رقم على جثتي
أنا ماتش كورة ف حتتي
أنا اللي راسم ع الشجر طول سكتي
أنا ال اخويا ياما دارى عَمْلِتِي
أنا مش عدد
أنا مش تاريخ انا مش بيان
أنا خَبْطَة عرفاها البيبان
انا اللي برقص ف كُل أفراح الجيران
أنا اللي بَأْرَف لو طِلِعلي الحبَّهان
أنا مش عدد
أنا مش عَلَم وشريط حداد
أنا مش مظاهرة ومش نشيد
أنا كُل ليلة وكل عيد
أمي هتِقْضيها ف سواد
أنا مش عدد
3 تعليق على { أنا مش عدد }
3 فبراير 2012 في 4:09 ص [حذف]
لا بارك الله في كل من تسبب في قتل الأبرياء ..
لا بارك الله في كل من ساهم و تخاذل في حق الشهداء ..
لا بارك الله في كل ظالم ..
ربنا ينتقم منهم كلهم
20 فبراير 2012 في 2:58 ص [حذف]
نصوصك رائعة, سلاسة وصدق... عامية في أغلبها مميزة
23 مارس 2012 في 11:14 ص [حذف]
أشعارك رائعه سلسة وهى ليست بشعر بل مشاعر تحولت الى حروف وكلمات
هل تريد التعليق على التدوينة ؟