آخرِة صبري

تعليق واحد1:08 م, بواسطة المحروسة


إبني الحيلة وآخرِة صبري
كان بيحب العيش بالمِش
كُل طموحُه جزمة كاوتش
وناخد الدوري
آاااه معلش
مش هيعِز على ال اختارُه
واهو راح دار احسن من دارُه
هيَّ الفقرا أصول ما تعِشّ 

كان بيحب تريكه وبيبو
وشايل قوي م اللي اسمُه الحضري
" هوَّ الأهلي فيه حد يسيبه؟
ده جدع فقْري"
يلّا نصيبُه
وانا طول عمري بفوَّض أمري 

كان بيحب يعشِّي صحابُه
كبده وكشري
أقرع نُزَهي فعز شبابه
أول مرّة يروّح بدري
راح ع الجنه وفاتلي عذابُه 

كان بيحب البت الواطيه بنت مغاوري
وانا من خيبتي وقفت قباله
يرجع بس واجوزهاله
وامسك فيه بإيدي وبضوافري
واخدم في مراته وفي عياله 

النبي فكره!
حد مسجل ماتش المصري؟
ألّا يكون شاور للكامرا
هو حليوة اسم الله وخمري
ولابس جينز
وفانلِّة كوره من الحمرا 

تحرير الرسالة…

تعليق واحد على { آخرِة صبري }

alhedar يقول...
10 فبراير، 2012 7:12 ص [حذف]

nرائعه رائعه رائعه

هل تريد التعليق على التدوينة ؟