ده سينو ابن اختي, والله ما حد ملقنه دي مشاعر الطفل البريء :)) مع كامل اعتراضي على ان الولد يشتم واتمنى تكون مامته حطته في النوتي كورنر
كل يوم
أنا كل يوم اخزي الشيطان واصبر ,,
واقول يا واد ما تشدهاش لا تكُر ,,
وان جالي يوم ملوش قفا من وش ,,
أضحك واقول مسيره بردو يمر ,,
أضحك واقول مسيره بردو يمر ,,
أنا كنت طير
في غير زمان وفغير وشوش الناس ،،
أنا كنت طير ألهم ولَد فرناس ،،
وفدنيا غير دي كان جناحي دهب ،،
زمن العجب صب جناحاتي نحاس ،،
أنا فاكرة لما كنت بحر ازرق ،،
وكان لي شط فرملته بغرق ،،
ياما فلاسفة غسلوا فيا التعب ،،
ولا كنت يوم برتاح ولا بزْهَق ،،
أنا كنت شيء قبل الزمان ما يكون ,,
وفضلت شيء جوا القلوب مدفون ,,
أنا اللي ياما غلب وياما اتغلب ,,
أنا الحكيم اللي اتولد مجنون ,,
بحلم
أنا كل يوم قبل اما انام أحلم ,,
أحلامي شابة مهما انا أقدم ,,
واندم كتير على يوم يضيع بلا حلم ,,
ولا عمري يوم على حلم ضاع اندم ,,
تعبتي يا مصر؟
تعبتي يا مصر؟ أغطيكي؟
تنامي شوية ترتاحي وقبل الفجر اصحيكي؟
تعبتي يا مصر اشيل عنِّك؟
أداوي حمارتك العرجا وامص السم من بدنك؟
تعبتي يا مصر اقوم انزل؟
أجيب الساهي من قصره يبوس رجلك ويتذلل؟
تعبتي يا مصر؟! ما تقولي!
ما تنطقي ولّا لساكي هتصبري لجل ما تنولي!
تعبتي يا مصر افضها سيرة واَسلاكي؟
دوشتك بالهتاف ارجع أقولها ف سري بهواكي؟
تعبتي يا مصر؟
أنا راخر تعبت يا بلدي ع الآخر
هتنطقي رهن انا طوعك
هتسكتى .. والله لا مهاجر
أهاجر فين!
وبلد ايه دي اللي ترضى بكل كراكيبي؟
قصص عمري وحواديتي هفوتها لمين؟
وأنهو مطار يعدّيني .. إذا هرّبتها فجيبي؟
أساور جدتي التَّعبان ..
مين لبساها في سويسرا عشان المحها واتشحتف؟
حكاوي حينا الونسان ..
وصوت زفة بنات شبرا.. فين هسمعها واتكيف؟
واهاجر كيف وانا يا مصر متكتف؟
قوليلي يا مصر عيزاني أهاجر ولّا اقوم اهتف؟
