تشاهد الأن جميع تدوينات شهر مارس 2013. إظهار كافة الرسائل

تعبتي يا مصر؟

تعليقان9:53 م, بواسطة المحروسة


تعبتي يا مصر؟ أغطيكي؟
 تنامي شوية ترتاحي وقبل الفجر اصحيكي؟

تعبتي يا مصر اشيل عنِّك؟
أداوي حمارتك العرجا وامص السم من بدنك؟ 

تعبتي يا مصر اقوم انزل؟
 أجيب الساهي من قصره يبوس رجلك ويتذلل؟

تعبتي يا مصر؟! ما تقولي! 
ما تنطقي ولّا لساكي هتصبري لجل ما تنولي!

تعبتي يا مصر افضها سيرة واَسلاكي؟
دوشتك بالهتاف ارجع أقولها ف سري بهواكي؟ 

تعبتي يا مصر؟
 أنا راخر تعبت يا بلدي ع الآخر 
هتنطقي رهن انا طوعك
 هتسكتى .. والله لا مهاجر 

أهاجر فين!
 وبلد ايه دي اللي ترضى بكل كراكيبي؟ 
قصص عمري وحواديتي هفوتها لمين؟
 وأنهو مطار يعدّيني .. إذا هرّبتها فجيبي؟ 

أساور جدتي التَّعبان ..
مين لبساها في سويسرا عشان المحها واتشحتف؟
 حكاوي حينا الونسان .. 
وصوت زفة بنات شبرا.. فين هسمعها واتكيف؟ 
واهاجر كيف وانا يا مصر متكتف؟ 
قوليلي يا مصر عيزاني أهاجر ولّا اقوم اهتف؟