تشاهد الأن جميع تدوينات شهر مايو 2011. إظهار كافة الرسائل

ما تولع مصر

أضف تعليق12:11 ص, بواسطة المحروسة

انا كان مالي ومال الثورة

ما تولع مصر

والا انشالله ما كانت حرة

أنا كان مالي اسهر واتمرمط

وانا سهل اتفلسف واتنطط

واتفرج مالبيت وأعيط

واما يجيبوا الديب من ديله

أفرح في الشارع وأزيط

انما تتقل حبه الشيله

وقلة أمن وحرقة دم

وحظر تجول

لأه يا عم

هارجع تاني أبيع الليله

ويبقوا صحيح قلة بتستعبط

واشتمهم بالدين والأم

زي ما خلوا حالنا يغم

وان نجحوا وانا باحبط فيهم

برضو أكيد الخير هايعم

أنا كان مالي

انا مصري وطيب وفحالي

يعملوا ثورة يعملوا حركه

انا عايش كده هو بالبركه

هاتقول لي أنزل واتظاهر

راح اقصر واجيب مالآخر

طز فكل اللي يقول لي انزل

وانا ليه أنزل؟؟

هو انا كنت طلبت عداله

ليه اتحمل

هَمّ البواب والشغاله

أنا لانا عمري حلمت اتوظف

ولا محتاج صرف انا باتصرف

وبرستيجي عمره ما يسمح

أحتاج تروماي أو مستوصف

يبقى انا مثلا هانزل ليه

علشان الأحزاب قال إيه

هو انا قلت انا عاوز حزب؟

مانا طول عمري سايبها وعارف

انها متزورة بالكذب

فيها إيه عادي

انا أصلا لانا عندي بطاقه

وشغل الساسه ده عندي حماقه

ناس براطيش

عايشين من عهد الطرابيش

مالي انا بيهم

روح يا بعيد احفر لك حفره

انا يتقال لي شعب وثورة

عرفتيني؟ باللهجة الصعيدية... إهداء لأجمل من فقد عينا.. إلى سنسن ابن عمتي اللي طلع راجل وطلعنا احنا سنسن

تعليق واحد12:07 ص, بواسطة المحروسة


عرفتيني؟
أنا الواد الهفا الهايف
أنا اللي قالتلك ملايتك اتغطي
ده مش حلمك
وقلتي عَلَيَّا لبنيتك اتبطي
لا ع يسَتَّركي يا بنيّة ولا يلمِّك
أغور أغرق قصاد شطي
تتاويني ولا يهمك
وتلعني إسمي لو جاب الهوا سيرتي
وانا متسمي على إسمك
عرفتيني؟

عرفتيني وانا نازل في برد الليل ومش خايف
سمعتيني وانا بهتف عاشقها يا اللي مش عارف
وشوفتيني وانا بَنرَشّ ب الخرطوش
وكيف السبع انا واقف
عرفتيني؟

أنا عرفتك
في وشوش نازلة بالملايين
وجيّانا تشد الحيل
أنا شفتك
أطبا وشعرا وبنات زين
بيحكوا في الميدان مواويل
وسمعتك
بتدعيلي في كل صلاة
ودمعك غرق المنديل
عرفتيني؟

أنا في الكرنك المنحوت على العمدان
أنا إسم وتاريخ مفحوت
في باب ازرق وراه سجان
أنا إبريل أنا كفاية أنا الإخوان
أنا كل اللي عدى وطل ع الميدان
أنا النسر اللي فوق علمك
عرفتيني؟

أنا يامّه مسامحك ع اللي فات كله
وبحبك
وعارف قسوتك كانت صدى ذُلُّه
ومش ذنبك
فديتها عيونك السمرا
لاغيني.. اتبسمي ليّا
جدايل شعرك الطاهرة
فوتيها تطير ب حرية

حمايم نيلك النِّعسانه على شطُّه
إحكيلها حكاوي الواد بتاع النت وشطارته
واعملي سيرتي غنيوة يغنوها المراكبية
واشغلي اسمِي ب الإبره على كُمِّك

وافرحي بيّا واتخايلي
ولفي بيّا وارقيني
وانشدي فيا واتمايلي
وزيدي فوصفي جامليني
وقولي الواد طلع شكلي
سماره الحُر من طيني
بحبك وانتي تستاهلي
أمانة يا مصر حبيني
أمانة يا مصر حبيني

لماذا لا يثور المصريون؟

أضف تعليق12:04 ص, بواسطة المحروسة

قالوا اني موش باثور

قالوا ضيعت العبور

قالوا طيب قالوا ساذج

شعب ينزل في المناهج

تحت تعريف الدواجن مالطيور

قالوا موش هاتقومله قومه

دالعيال على قلبه كومه

وكل همه ازاي يوفر

من عشاهم للفطور

قالوا آخره ماتش كوره

ومين مأنجج مين في صورة

ويبقى شايل هم ميدو وعقد جدو

وهو ساكن في القبور

بس هس المصري قام

اقطعوا شيء اسمه نت

وهاتلي فتوى من الإمام

روحي بيتكم يا بت

الحقونا يا قيادة

فيه بشر شايلين علام

اهرسه ياض بالبياده

واضربه تحت الحزام

ليلة بيضا ليلة زرجا

بندجيتي ماعتش فارجه

ليله بيضا ليله زرقا

ماعادش حاجه بجد فارقه

اللي عنده عيال رماهم للوليه

وقال لها نازل اجيب بكره بإيديه

واللي حاجز قاعة أو زفة كمان

خد عروسته وزفها فقلب الميدان

كان ناقصنا نقش حنه

و كام طهور

ونجيب لعم شفيق جنان

الخلاصه ..

طلعنا جدعان بالوراثه

واللي قالوا عليه بغلي

وموش بافور

بيمسحوا كفوفهم فتوبي

ويدعوا حكامهم تغور

يلعن أبوكم

أضف تعليق9:40 م, بواسطة المحروسة



يلعن أبو الليبرالي ع الأحراري
ع اللي يفتح بقو يقول انا يساري
ع اللي بيسَرّح ف دقنه هناك ومتداري

يلعن أبوكم كلكم
خَلَّف ولا ربّا
لسّاكو بتعكعكو
والبلد طابَّه
دانتو ولا نسوان
واتعاركو على خاطبه
أجيب لـ دي عرسان
دي تقول لي مش لاعبه
ماتلمّوا روحكو بأه
وتسترجلوا حبه
لانا روحي منكو خلاص
بقت فـ منخاري

أول ما قالوا الملك
وقع ولا سمّى
ولا كلاب السكك
نطيتو على عضمه 
يا خيب الرجا فيكم
يا خيبة الأمه
الثورة صبحت عار
والثوري بأه تهمه
بتتفلسفوا على شعب
بيفلسف اللقمه!!

واكمن مات الغول
رميتوا عصيانكم
كتب عليّا غباكو
يا نخبه عصيانكم 

هو انت فعلا غبي
والا انت مش داري
دي ثورة يابن العبيطه
مش جيمز وأتاري

لو حتى مات الملك
أو راح فـ خرّاره
لسه جيوش الملك
صاحيه وجرّاره
واكمن فهمك بطيء
خدها بقطَّارة

الجيش ده جيش الملك
يا حلو مش جيشك
وان كنت باقي على
شربك وعلى عيشك
انزل وقول للجيش
مات الملك فَرفَر
وانا م النهارده الملك
اتصَف يا عسكر!!
واسمع كلام الملك
تلقى الملك سكّر

ما ضربتناش بالنار!!
تِسْلَم يا ذوق تُشكر
راح نفتكرلك جميلك
بس انت تتنحرر
آن الأوان يا جيش
انا وانت نتحرر
ماتسيبش غلطة زمان
بالغصب تتكرر
الجيش مكانه الميدان
مش عندي في المَنْوَر
أو ع الحدود ددبان
فُوتها عشان تِعْمَر

لك شوق لشيء غير كده
أنا الميدان داري
شايك أهو وقهوتك
واحسبها يا جاري
وحط دي فـ حِسبتك
أنا مش بسيب تاري