تشاهد الأن جميع تدوينات شهر أبريل 2012. إظهار كافة الرسائل

مخنوق

تعليقان12:47 م, بواسطة المحروسة


لمّا تحِس انَّك مخنوق
ارفع راسك حبَّة لفوق
إما الهوا هـ يوسّع صِدرَك
إمّا السما ترميلَك طوق

واما تحس الناس وحشين
خليك أحسن م الباقيين
تلقى الدنيا بترْمي فـ حِجرك
ناس ولا كل البني آدمين

واما تحس انك متضايق
أو مش فايق
خُدلك دوش وسرَّح شعرك
فوَّض للي بيُجْبُر أمرك
تِصْبَح  رايق 

واما تحس الثورة بعافية
إدعي على اللي جابولها الكافيَة
وانزل ع القهوة اللي فـ ضهرك
وَعِّي الناس واشرب حاجه دافية

لم أكن أنتوي

أضف تعليق11:50 ص, بواسطة المحروسة

أنا لم أكن يا مصر ناوي
أبْدُر ترابك بالغناوي
والِفّ ع الناس في القهاوي
أحكي حكايتك بالغُنا

أنا لم أكن يا مصر عايز
أشِم غاز واحْدِف قزايز
الثورة ما بتديش جوايز
ولا حد عارف إسمنا

أنا لم أكن يا مصر لكن
قررت اكون كُل الأماكن
أنا الميدان وانا المدافن
وانا اللي حارس حلمنا

أنا لم أكن لكن هكون
نور الحقيقة في العيون
صرخة وبتشق السكون
أنا ضَيّ أحلامك أنا