تشاهد الأن جميع تدوينات شهر يوليو 2011. إظهار كافة الرسائل

أخي السلفي: فستانك كول قوي

تعليقان2:15 م, بواسطة المحروسة


تفتكروا ممكن ييجي اليوم اللي نشوف فيه حوار كده؟ " واو يا مان فستانك كول قوي نياهاهاهاها... يقوم التاني يديله شلوط هزار وهو بييقول له ياض اسمه جلباب يله... انا هافضل اعدل في لسانك المعووج ده طول عمري.. الفستان ده يلبسوه أمثالك..." وهاهاهاها وههههههه وكركركركر وبس كده :)) طبعا هاتقولولي ده فيلم هندي فاكس واتشال من السينيمات تاني يوم ما نزل.

طيب واللي عاشت الفيلم ده؟ في يوم من ذات الأيام - حلوة ذات الأيام دي - تعرف زوجي على شاب ملتحي ,كان المصري الوحيد في عمل زوجي الجديد ولذا تصادقا بحكم ندرة الموارد... وعندما تعارفنا كأسرة فوجئت أن زوجته منتقبه ... تعجبت لأن زوجي تقريبا لا يصلي إلا في المواسم فلماذا يقرر صديقه السلفي أن يصادقه بينما المكان مليء بسلفيين من جنسيات أخرى ناهيك عن إدخاله إلى أسرته وتقديم زوجته لقمة سائغه لسافرة مثلي "وشها مكشوف" على رأي أمثالنا القديمه عشان اللي بيقولولك مصر مافيهاش حجاب وده شيء دخيل داحنا بنقول عالبجحه "وشها مكشوف" واحنا كلنا وشنا مكشوف ومش حاسين بمعنى كلامنا ههههههههه والله شعب مسخرة.

المهم اننا دخلنا جلسنا في غرفة وحدنا وكشفت وجهها فإذا بها نسخه طبق الأصل من "مها" صديقة عمري... كسر هذا التشابه كل الحواجز وقتيا... كنت أنظر إليها فأرى صديقتي التي أفتقدها... وكلما تحادثنا كلما اكتشفت إنها سكر... دمها خفيف جدا... طيبة جدا... لم تحاول أن تعرض علي أي أفكار دينيه أبدا... كانت تحفظ دروس الشيخ حسان والشيخ الحويني كما تحفظ أفلام عادل إمام بالضبط... وتستشهد بهم في أي موضوع.. الطبيخ.. العيال.. حماتها ...كانت مسخرة بصراحه لما تقعد تحكيلي مسلسلات عمري ما شفتها وتستغفر وهي بتحكي وبعد ما تحكي تستغفر تاني.. مرة عشان شافت المسلسل ومرة عشان جاهرت بالمعصية وحكت انها شافته...آه والله :)) 

ومرت أيامنا القصيرة في الغربة حيث لم يحتمل زوجانا الغربة فعادت هي وزوجها أولا وتركا الدولة الوهابية التي يظنها أكثرنا جنة السلفيين ومرادهم... لم يحبا الحياة بعيدا عن مصر التي لصقت بهم شتى أنواع التهم... لم يختارا العيش حيث الكل منتقب وملتحي.. فضلا الوطن على مجتمع يشبههم شكلا.

أنا وزوجي عدنا عندما قامت الثورة.. وصلنا أرض الوطن يوم 28 يناير... مع نزول الجيش إلى الشوارع... طلبونا ليطمئنوا على سلامة الوصول... سألتها إيه أخبار المظاهرات قالت "احنا مالناش دعوة بالحاجات دي.. قلتلها ليه.. قالتلي عشان حرام."  قابلتها بعد ذلك وأخذت أحكي لها عن الثورة وعن الشهداء وعمن فقدوا أعينهم وأحبتهم... أخذت تبكي وتدعو الله أن يتقبلهم شهداء وأخبرتني أن أخاها رفض فتوى حرمة النزول ونزل واعتصم مع المعتصمين.... الله؟؟؟ هو السلفيين مش ليهم أمير والا إمام كلامه يمشي عالرقاب؟؟ قالتلي لا مش احنا دول الجهاديين اللي انتي تقصديهم... الله؟؟ سبحانك يا ربي يعني انتو أحرار قالتلي طبعا.. قلتلها والنقاب ..قالتلي النقاب قضيه خلافيه جدا... انا أغلب عيلتي مش منتقبات...قلتلها وعادي يعني مش مقاطعاهم ومكفراهم؟ ضحكت ضحكة مجلجله وقالتلي لا سابينهم بنسمنهم عشان نشوي كل يوم واحده عالغدا. :))

صديقتي السلفيه عرفتني على وجه جميل للسلفيين كما عرفتني صديقتي الإخوانجيه على وجه جميل للإخوان بس دي حكايه تانيه في لقاء قادم.
 أرسل لي أحد القراء هذه المقاله المهمة التي أعتبرها دراسه مبسطه من طرف محايد لتعريف السلفيين ولتفسير أحداث جمعة وا إسلاماه .

طيب خلاصة حلقة اليوم من العلم والنورهان اللي انا قدمتهالكو دي ان زي ما أغلب الليبراليين ناس لطاف ومثقفين ومش بيجروا ورا المحجبات في الشارع يعضوهم من دراعهم ويقولولهم لأااااااااااااااااااااه دي مش ثقافتنا ده مش شكلناااااا زي الست فريده الشوباشي... 
برضو السلفيين مالهمش ذنب في الصورة اللي رسمهالهم الإعلام ولا ليهم ذنب في ما يعرضه قيادات السلفيين اللي معاهم فلوس يطلعوا في التليفزيون...  يعني لو مثلا ممدوح حمزه لا يمثلك ولكن يمثل غيرك ..هي كمان شيوخ التليفزيون لا يمثلوها... ولكن قد يمثلون آخرين هي لا تعرفهم وإن كانت تشبههم تماما شكلا... تعرف بنفسك على الآخر وافتح قلبك وعقلك واحضن مصر.

روابط ذات صله عاطفيه وثيقه
وسّع مصر

تضامنا مع الصومال

أضف تعليق10:36 ص, بواسطة المحروسة


اقسِم لُقمه يطرح بُكره
ف عيون طفل
اقسم هِدمه تستُر عَورة
كُل العالم إخوة وأهل

اقسم خيرك
وادِّي لغيرك
ده الخير فكره
بس يهل


 البريد المصرى حساب رقم 148741 لجنه الاغاثة بأتحاد الاطباء العرب ده اسهل واسرع

قوس قزح

أضف تعليق3:04 ص, بواسطة المحروسة



وهافضل احلم بيكي صفحه ملونه
منقوشه من عهد المسيح
وحاميكي دايما ربنا
وهافضل احلم بالبراح
اللي يساع م الحُب غيطان انشراح
ويلمِّنا

وهدَنِّي أرسم ع السما أقواس قزح
واشغل ف تيجان الفرَح
وابدر حنان جوه القلوب
يمكن فيوم ألقاه طَرَح
ضلل علينا كلنا

وهفضل احلم بالعيون الدفيانين
حب وحنان
وهفضل احلم بالعيال الشبعانين
والليل جعان
مش لاقي لحمه ع الرصيف
والظلم طيف
خايف يبان على حينا 

وهفضل احلم ابقى راهْبة ف دير بعيد
وامي تقول لي مفيش ف ديننا رهبنه
الحلم مفهوش عَنْوَنَه
إنشالله أحلم أبقى قطة صغننه
الحلم عيد 

وهفضل احلم
لمّا أحلامي تقوم وتشِّدني
يا اللي نفسك بالحقيقة تهدِّني
أنا مش حقيقة عشان حقيقة تهِزِّني
أنا حلم انا..أنا حلم انا












عِلم الخشاف

3 تعليق2:14 ص, بواسطة المحروسة
ستين سنة فحالة جفاف
بنخاف نقول.. بنخاف نخاف
ممنوع علينا ندوق حلاوة لاكتشاف
...
فجأة اترمينا ف وش بعض
المرابط

واللي شاطط
واللي متشعلق وشابط
وكل واحد صرخته طلعت هتاف

اللي نفسه ف الحداثه 
واللي همه لقمه حاف
واللي سارق والسريقه ف اللحاف

والدم ساح والدم سكر
دُوبنا رغم الاختلاف
واترمينا فقلب حله
ألف حركة وائتلاف

والحل كل الحل في عِلم الخشاف

تحليلي لأحداث العريش

أضف تعليق8:06 م, بواسطة المحروسة


http://www.almasryalyoum.c​om/node/481105 اقرا الخبر ده واربطه مع ده
http://www.alittihad.ae/details.php?id=71170&y=2011
الخبر الأول القبض على شحنة مخدرات كبيرة في نويبع ومسلحين يهاجمون الميناء محاولين إخراجها والأمن يحبط المحاولة!! ده ولا شيكاغو
الخبر الثاني : حماس تداهم منزل دحلان وتجرد أفراد حراسته من السلاح وتعتقل عشرة منهم

... دحلان ده أحمد عز بتاع فلسطين وعميل صهيوني كان في فتح وبعد المصالحه فتح رمته للقطط وامبارح بس داهموا بيته وجردوه من السلاح واعتقلوا حرسه وهو بدوره توعد بالرد... دحلان تاجر سلاح ومخدرات كبير جدا... وله رجاله كتير قوي ف سينا "مع كامل احترامي للإخوة السيناويه بس مافيش مكان بيخلا من ابو شفه وابو بشله"  الشحنه اللي اتمسكت غالبا كانت بتاعته "ما خلاص بقى مغضوب عليه" وماعادلوش لازمه عند الصهاينه لانه عميل واتحرق قوم شحنته اتمسكت قام باعت ناس مسلحين يحاولوا يهربوها بالقوة قوم الجيش والشرطه أحبطوا المحاولة قوم غالبا مصر كلمت حماس قالتلها تربي دحلان قوم السلطه الفلسطينيه داهمت بيته كما قلنا فوق قوم دحلان توعد بالرد كما في الخبر التاني قوم غالبا هو ده الرد اللي هو رده على ضبط شحنته بتاعة المخدرات... التحليل ده قد يكون فيه نقط بسيطه مش صح يعني مثلا يمكن الجيش ما قالش ربوه وهو بينتقم للشحنه بس... انما غالبا هي شكلها كده

عسكر عسكر

أضف تعليق11:29 ص, بواسطة المحروسة

عسكر فوق وعسكر تحت
سرقوا الثورة يا ميلة البخت

وسَّع مصر

تعليقان9:40 ص, بواسطة المحروسة


قول تكفيري وقول علماني
كِسِب القصر

افتح سلفي على ليبرالي
توسع مصر

قول انا بفهم وانتو بهايم
قول انا مسلم وانتو عوالِم

ضاعت بلدي يا عم الفاهم
 ضاع الأقصى ف وِسط النَّعر

قول انا مصري...قول انا حُر
قول انا وانت شربنا المُر

قول له بحبك رغم غباوتك
قولها بضحكة ووريه شقاوتك

حلوة الضحكه وبتوحدنا
ضد الظلم وضد القهر

بعد السلام - هلال رمضان

أضف تعليق7:37 ص, بواسطة المحروسة



بعد السلام
على جيِّة هلال رمضان
نشم روايح الجنة
وتعلى قيمة الإنسان
بأخلاقنا

ندور تاني على شمعة
لفانوس الواد
تهل بشاير الأعياد
وتملا عيون عيال بيتنا
لعب وحاجات
تقيس البنت فستانها
سبع مرات
ماهياش قادره تستنى

ومع انو ده شهر الزهد والزهاد
وشهر تلم فيه للآخره خير الزاد
يزيد في الشهر ده التموين
وتلقى الحاجه طاءها طائين
وتلقى الكل بيتابع
مؤشر بورصة السمنه

جميل رمضان
قليل عالدنيا
تلاتين يوم
في قرآنه وتراويحه
قفلت القلب على حبك
يا شهر الصوم
وسلمتك مفاتيحه
جميل ده الشهر ياخواننا


يا ريت كل الشهور رمضان
يا ريت كل الليالي صيام

بعد السلام - كلام الحُر

أضف تعليق4:09 ص, بواسطة المحروسة



بعد السلام
هي كلمة وكلام الحر
واحد ما يتتنى
الصبر لو كان مر
آخرته الجنة
والثورة لو هاتضر
يا ريتنا ما كنا

الثورة لو هاتجيب
عيال مجاذيب
وناس ماخط فيها الزمن
غير خطوط الشيب
ده يبقى عيب

والثورة لو هانسيبها
 للألاضيش
وللدراويش
ولكل كلب كنيش
تبقى ماتلزمنيش

الثورة دي هدية
منقية
لا هى لقية
ولا صدفه مرمية
وانا مالحقتش اتهنا

يا رب ليك الأمر
عبدك وباتمنى
ديم علينا الوفق
ولا تديملناش حكام



على باب الزمان

أضف تعليق2:53 ص, بواسطة المحروسة



على باب الزمان
وقف التاريخ مرعوب
وعالجناب صفين
شهدا ووراها شعوب
وتحت رجل الزمان
كان الميزان منصوب
حط التاريخ دفتره
شاف الميزان منظره
ضحك وقال بهدوء
"لسَّاكو بتزوروا؟
كل الكلام مقلوب
 والصورة مابتكدبش
ولا الرصاص والطوب
خد دفترك غيَّرُه
واكتب كما عُلِّمت
كفنك مالهش جيوب"

 
وقف التاريخ مسكين
عرقان وخايف موت
يكتب كما شايف
والا كما الخايف
يكتب كلام مغلوط
والا يقول لسه
محتار ومش عارف
وبلم لسه خيوط
 يحكي كما العصافير
 عن ثورة التحرير
والا سلامه فخير
وخير سلامه سكوت
 

كتب التاريخ ما كتب
الخط لاحمر شَطَب
مين يفهم المكتوب؟
دنيا وليها العجب
حتى التاريخ مغلوب

زعق البعيد زعقه
قال للتاريخ "حقه!!
جاي النهارده تفوق؟
وتقول بشر وحقوق؟
تكتب كما تؤمَر
سوا راضي
سوا مغصوب
يا خادم السلاطين
يا خاين الملكوت
دفنت ناس بالحيا
وحييت رِمَم مالموت
دانا اشتريت ذمتك
من عهد حتشبسوت"
,,,,,,,
عجبي عليك يا زمن..
حتى التاريخ ملطوط


يلا إرحل يا بشار

أضف تعليق1:05 ص, بواسطة المحروسة



يلا ارحل يا بشار
ألعن منك راح وغار

وانت يا جاحد
عامل جامد
بكره يجيك الشعب الصامد
تهجر جحرك زي الفار

ويلا ارحل يا بشار

يا بشار ويا سي ماهر
لو ما نقدر الله قادر
عالسفاح الباغي الفاجر
اللي بيضربنا بالنار

ويلا ارحل يا بشار

يا جار اتطلع بجارك
يا بشار شوف مبارك
بس توقع مين ياخد تارك
ولك خد عبره من اللي صار

ويلا ارحل يا بشار

يا بشار نهايتك جايه
طالعين ورافعين الرايه
ما بدنا وصاية ولا حمايه
بالله وبإيدين الثوار

ويلا ارحل يا بشار


ومن أرض الثورة المصرية
سوريا بدها حريه
سوريا بدها حريه

إهداء إلى روح شهيد حماة إبراهيم قاشوش كاتب أغنية يلا ارحل الأصلية... اقتل كل شعراء العرب ولن تحيا يا بشار

لا ترحل: إهداء إلى بشار الأسد

تعليق واحد12:53 ص, بواسطة المحروسة


لا ترحل
مثلك لا يرحل
مثلك يحبسه الذنب
فيتغوَّل
ويظل يقول مثيروا الشغْبِ
ولا يخجل
فيضج أخيرا كل الشعب
بما تفعل
يتوحد صفاً يتكتل
ويحِلُّ نهارُ الحَلِّ
فتُقتَل

لطفا لا ترحل
رأسك أثمن رأسك أثقل
مِن أن يُنقل أو يتنقل
 من سيزين باب الحارة
إن أنت ستذهب
من لعرين الأُسد..
ومن للحزب
ومن للمذهب؟
ابق ستبقى
تبقى حرزاً
تبقى كنزاً
رأساً معروضاً في متحف درعا
يعلن أنك كنت الأكثر قمعا
كنت الأكثر طمعا
والأضعف سمعا
أو محض مغفل

لا ترحل
إن أنت قبلت
فلن أقبل
تدوينات ذات صلة

أول لاجىء

تعليق واحد3:26 م, بواسطة المحروسة


يا فلسطين أول أحزانك
مش أيام الوعد ما خانك
ولا أيام 67
أول حزن دخل من بابهم
أول طفل يدوق إرهابهم
بعد ميلاده يادوب بيومين

لما أرادوا الشر بمريم
عيسى الطفل فمهده اتكلم
برأ أمه ونفسه وسلّم
قالوا يموت
وكانوا بأمر الله سالمين

خدها يا يوسف وانزل مصر
وبارك شعبي ليوم الدين
وارعى يسوع الطفل أمانه..
شيلوه في عنيكوا يا مصريين
رد تراب الطاهره يا مرحب
يسكن جوه حباب العين

قولي يا شجرة مريم واحكي
فاكره العدرا وهي بتبكي
حاضنه بشارة جيلنا وخايفه
ست الدنيا لمين راح تشكي
قالت ربي احفظنا آمين

كبر الطفل ما بين أراضينا
أول لاجئ منك لينا
دايما يافلسطين تهادينا
وقولي نرد جمايلك فين

واما أراد الرب صنيعته
كان على عيننا نرد وديعته
بس عشان الجود في طبيعته
بارك نيلنا وأرضه وشعبه
قبل ما يرجع لفلسطين


ياللي بورقه وحسبه عاددنا
إحنا جنود والمولى قائدنا
وعد النور الهادي نبينا..
عز المحنه يسوع حايجينا
يلقى جيوش مالحواريين
مصر جيوش مالحواريين...