تشاهد الأن جميع تدوينات شهر أكتوبر 2011. إظهار كافة الرسائل

شقاوة

تعليق واحد2:29 ص, بواسطة المحروسة


مجرد شقاوة
كلامي وهزاري
جراءتي وكسوفي
طبيعتي اني اداري
واكسَّر فخوفي
يا ريت تفهميني يا دنيا بهداوة
أنا مش شقية وبحب الشقاوة

إياك تنزل

أضف تعليق2:19 ص, بواسطة المحروسة


إياك تنزل
لو مش شايف مصري ذليل
إياك تنزل
لو بتنام آمن بالليل
إياك تنزل
لو شارعك مرصوف وجميل
إياك تنزل
داحنا اللي نجيلك يا جميل

شمس ومطر

أضف تعليق2:11 ص, بواسطة المحروسة


عندما أبكي..
 يخرج الأطفال للشوارع
 يلهون تحت دمعي
 ويختفي الزحام
وعندما أضحك
تبحث قطتي عن مكان
تحت ضحكي
كي تكور جسدها وتنام.



هلاوس مرئية

أضف تعليق2:01 ص, بواسطة المحروسة

كأني أحارب كيلا أحبك
كأني أقاتل كي لا أذوب
وأنت تحاصر قلبي بقلبك
فقل لي بربك كيف الهروب

وأعلم أنك مثلي تحارب
وأعلم أنك مثلي شريد
وأعلم أنك رغم المتاعب
تئن لوصلي وتبغي المزيد

كأنك فوق الشفاه الترقب
كأنك تحت الجفون الأماني
كأنك تكوي فؤادي فيكتب
وتنثر رماده فوق المعاني

عذِّب فؤادي

أضف تعليق1:58 ص, بواسطة المحروسة
عذب فؤادي... إني استسغت الألم منك ألفته
واصلب شعاع النوم فوق الأجفن السمراء
كحل بشوقي كل أشعار المساء
يا ليتني قبل الزمان عرفته

حكمت المحكمة

أضف تعليق1:54 ص, بواسطة المحروسة



حاصل ضرب الشرطة ف واد سفروت
سبعة يا دوب على علقة موت
حاصل ضرب الجيش في الشعب
موقف صعب
بس يفوت
والعدرا تجلت ب الغصب
قُطُع العسكرع الكهنوت

رباعيات

أضف تعليق1:46 ص, بواسطة المحروسة


بلدنا يا حِبله بطنك خلاص حَجَّرِت
ألم المخاض ساعتين والثورة دي اتأخرت
ولدك كإنه النور لو تطلقيه ينوَّرك 
تسقطيه تسقطي تخلفيه يحررك

الكنبه

أضف تعليق7:45 م, بواسطة المحروسة

لسه فبيتك؟
حلوة الكنبه؟
لساك عايش نفس الكدبه؟
لساك بتصدق عمور؟
الفلة الشمعة الأمور
وبتستنى مسلسل عشرة
يوه جتك ثورة!

لسه مصهين لسه طناش؟
خلي فدمك حبة شاش
وانزل جرب
امسك في السلك المتكهرب
قول انا حي
لو هاتموت وانت بتنطقها
خليك ضي
فكر في الشمس اللي عاشقها
حلوة الشمس؟
ماهي محروقه
وضد اللمس
لجل انت تلظلظ وتربرب
قوم اتحرك
وانزل جري
قول انا حي
قول انا حي



إوعى تهاجر يا مايكل

تعليق واحد7:21 ص, بواسطة المحروسة
دي تدوينه قديمة سحبتهالكو من عالفيس بعد حوار على تويتر فكرني بيها.
by Marwa Maamoon on Monday, May 16, 2011 at 9:44pm
والشنطه برضه ماتتقفل
وف ارض بيتنا متبّته
وعينيها لسه مثبّته
على لعبتي
ولـ بسمه فارقت فَرشتي
ولكراسات الأنشطه
ولـ فرده واحده مهربده
بصيت عليها
قلت ليها
ياترى
متأكده؟"
— مايكل عادل

ده شعر مايكل عادل شاعر معرفوش أبدا... كنت بكتب قصيده مطلعها عسكر فوق وعسكر تحت وبعدين حبيت ادور على بقيت أغنية الأطفال دي عالنت... لقيت مايكل كاتب ابيات شعريه بنفس المطلع... شدني شعره قوي... أسلوبه وإحساسه شبهي قوي

شدتني مدونته وفضلت اقرا وبعدين قريت الأبيات بتاعته دي... وقعدت اعيط
انا موش مصدقه ان فيه فتنة... بس متأكده ان فيه حد عاوز يعمل فتنة... وموش عاوزاه ينجح أبدا

أنا بترجى كل انسان على أرض مصر... ما تسيبش حد يوقع بيننا أبدا...  أنا بجد خايفه قوي... موش خايفه مالحرب الأهلية... أنا بس خايفه يوم ادور على مدونة مايكل الاقيه بيكتب من كندا... عشان مالقاش نفسه وسطنا

على فكره انا موش قصدي ندي مميزات غير مفهومة للكنيسة ولا نسكت على أي مخالفات.... انا بس حبيت افكركو ان فيه ناس كتير زي مايكل... لا ليها دعوة بكاميليا ولا وفاء ولا ليها دعوة بتفتيش الأديرة.... مواطنين زيي زيكو... هم اللي بيتظلموا في النص... هاتقول لي ماهى كنيستهم... طاب إيه رأيك بقى ان مصر فيها 3 كنايس عندك كاتوليك وعندك بروتستانت  وعندك ارثوذكس... كل الخلافات مع كنيسة واحدة وخلافات قانونية وجنائية كلها تحل بالقانون لا بالكراهية... ده غير ان الكنيسة لا تمثل مواطنيها بالعكس مواطنين مسيحيين كتير ليهم مشاكل مع الكنيسة.. فا خد بالك زي ما بنزعل لما حد يهاجم المسلمين بأفعال قلة لا تعبر عنهم... انت كمان اوعى تظلم حد بذنب حد تاني... خليك فاكر "لا تزر وازرة وزر أخرى."   ويا ريت اللي يعرف مايكل عادل يقول له مروة بتسلم عليك

تابووو

تعليق واحد2:54 م, بواسطة المحروسة

من حقنا 
نحلم ويبقى الحلم جنة تضمنا
ونكون فوسط الناس
فدنيا لوحدنا
وكل نظرة تكون ميعاد
وكل بسماتنا قُبَل
تقول صباح الخير
وانا اسمعها غزل

من غير خواتم ولا دِبَل
من غير خواطر ولا زعل
انا وانت بس
اشترينا بعمرنا 
لحظة جنون
والزمان قِبِل البَدَل

وان قالولنا الحلم عيب
يبقى إيه بس العمل
عشاق كتير من قبلنا
دفنوا ريسانهم في الرمال
ماتوا بقدرة قيل وقال
وصبحوا غنيوة ومثل

أوليا وقديسين

أضف تعليق7:36 م, بواسطة المحروسة


هاتوا عباية الولي شي الله يا طاهرة
ولِف فيها اللي اتقتل بالغدر ف مظاهرة
هاتوا البخور أشكال
والمستكه والهال
وتوِّه الموَّال في الذكر والحضره

العدرا ظهرت
 نورها غطى الدم في الفستان
 العدرا بانت
يا هنانا لما هي تبان
العدرا طلت وقالت الشهيد فرحان
 العدرا لابسه بياده وعلى صدرها نيشان

في النور

تعليق واحد6:18 ص, بواسطة المحروسة

ما تيجوا نحبها زيادة
ما تيجوا نحبها في النور
دي حلوة وعشقها عبادة
وعشاقها صفوف بالدور

ما تيجوا نحبها زيادة
ما تيجوا نحبها بالكوم
إلهي نقطع العادة
ونتعود نفز نقوم
ما تيجوا نحبها زيادة
يا رجاله يا عيب الشوم

ما تيجوا نزور ميادينها
وننزل في الشوارع بوس
ونرسم نورنا في جبينها
ولو حتى علينا تدوس
دمانا تحُط في نجيلها
تحَبِّلها 
نموت وتضل ولاده
ما تيجوا نحبها زيادة


صباح الثورة

أضف تعليق12:00 ص, بواسطة المحروسة

صباح المدنه تنده عالنفوس تتشد
صباح التوعية والحشد
صباح يرسم على الجدران آيات المجد
صباح الأزهري يردد
وابونا يصلي ويمجد
صباح الورد

صباح الورد عاللي يخُط خَط النار
صباح الثورة عالعسكر جنود العار
صباح النصر يا شهدا ويا ثوار
صباح العندليب ينشد
ومنديل سومه يستشهد
صباح التار


صباح الحضرة والطبلة ودق الزار
 صباح يلقى الغريب الدار 
 وتتعفر وشوشنا ونبقى مالأحرار
 مافيش حرية من غير نار
مافيش حرية من غير نار

نبض جديد

أضف تعليق9:22 م, بواسطة المحروسة



كتبت جديد
برغم الفرقة والأحزان
نقشت الإيد
بنفس الفرشة والألوان
نهار العيد
نهار شمسك يا مصر تبان
تقول أناشيد
نغني كمان
تقول الله
نقف ونعيد

رسمت وشوش
برغم الخوف من اللي لسه معرفهوش
حضنت قلوب
فتحت القلب يتشمس وهو يا دوب
أمانة يا ناس ماتجرحوهوش

كل الأحبة

أضف تعليق5:56 م, بواسطة المحروسة

‏ انقضي الأبيض من الألوان
وحُطي الاسود جنب كوم القهر
ورشي زهِرك كله ع القمصان
واكوي الياقات زي الجبين بالصبر

طالعين يا مصر الفجر مـ البيبان
ومش هنرجع إلا وش الفجر
حالفين على شمس الأمل لا تبان
نادرين ما نرجع غير بطوق النصر

‎‏ قومي لبسينا الورد والتيجان
شهدا وطالعه للسما مـ القبر
لِفِّي العلم بالراحه ع الجثمان
بالراحه يامَّه ع العيدان الخضر

ولفي بينا كل بيت وميدان
وفرجينا للقلوب الصخر
وزغرتي على زفة العرسان
كل الأحبة اتشاهدوا فيكي يا مصر
كل الأحبة اتشاهدوا فيكي يا مصر

فيفيان

تعليق واحد10:59 ص, بواسطة المحروسة

‎انا كنت جايه اتحامى فاعتابِك
ليه كل ماجي تقولي إيه جابِك
انا كنت جايَّه وقلبي على قلبِك
فيه إيه يا مصر فشكلي مش عاجبِك؟

انا كنت جايَّه وواخده على خاطري
دانتي الحروف السمره على سطري
انا كنت جايه اهتف باموت فيكي
مات اللي عَلِّم قلبي يفديكي

رسالة من أُم مينا

أضف تعليق7:30 ص, بواسطة المحروسة

‎ قولوا لعساكر الجيش
مينا خلاص راحل
مينا اللي باع الغاز
 مينا اللي يستاهل
مينا اللي جاب الجمل
مينا ابراهيم كامل

‎قولوا لعساكر الجيش
معلش لا مؤاخذة 
مينا اللي عالمعبر
 مينا اللي باع غزة 
مينا اللي زاحمها 
ومنّشِّف المِعزة

قولوا لعساكر الجيش
مينا خلاص طافش
ما جاتلهوش هجرة
جاله عيار طايش

ماسبيرو

أضف تعليق5:53 ص, بواسطة المحروسة

يا مصر قومي وانفضي شعرك
كام ألف حية لابده ف ضفايرك
ما تفيض يا نيل تمحي الوشوش السَوْ
إرحل يا ليل مشتاق لعيني الضَوْ
حمرا يا غولة عنيكي يا جبايرك

يا مصر قومي واغسلي بَدَنِك
كام مرة فيكي دفعت انا تمنك
يا مصر قومي ده الزمن عجنك
والشهد عندي قَطَّري سمنِك

يا مصر قومي لحمنا مرَمِّي
كم مرَّة يامَّه هاتدفني لحمي
يا مصر قومي يا بلد هِمِّي
 رقابنا نافرة والسلاح مَحمي

يا مصر قومي لا العنك عمري
إياكش غرِّك طول سنين صبري
بركان وساكن رملك الخمري
ساكت ولكن إوعي تتغري


يا مصر قومي ده المخبي جميل
جَيّ النهار حتما يشق الليل
طول ما الكتاف في الكتاف لزقه
طول ما القلوب متلهفة وعاشقه
هـ يصُب تاني في القلوب النيل
, , , , ,

الكائن القبطي المهدد بالانقراض

3 تعليق11:41 م, بواسطة المحروسة

كنيسة أخرى تحترق.. اللعنة.. سأقف موقف المدافع عن سماحة الإسلام لأسبوع أو أكثر.. أفتح حاسوبي النقال أبحث عن الأخبار.. الحمد لله المحافظ أكد أن المبنى مخالف.. أي أن غضب أهل القرية مبرر.. سأخلد للنوم الآن بضمير مستريح.. أصحو من النوم وأعود إلى فضاء الشبكة العنكبوتية لأفاجأ بنبأ يتوارى خجلا.. قوات الاحتلال الإسرائيلية تضرم النيران في أحد المساجد شمال إسرائيل.. مشهد المصاحف المُحَرَّقة يخلع قلبي من مكانه ويقذف به في قلب حريق الماريناب.. لن يجول ببالي أي تساؤل عن تراخيص المسجد أو حتى فيم كان يستخدم.. لا يعنيني لو كان بأعلاه منصة إطلاق صواريخ.. إنه مسجد.. وتلك كنيسة
أوجعني تعليق كتبته صديقة تحمل للمسيحيين كل الحب "المسيحيين ما ينفعش يختفوا دول طائفة تاريخية"... طائفة تاريخية!! أعرف أنهم سلالة جينية نادرة ولكننا لا نحافظ عليهم لأنهم كائنات مهددة بالانقراض!! إنهم أهلنا.. رفاق الطفولة وأحباء الصبا.. إنهم معلمتي "ميس نجلاء" التي لم أعرف أنها مسيحية إلا بعد أن توظفت وجاءت إلي مكتبي لتقضي معاملة وقدمت لي بطاقتها لأفاجأ بأنها مسيحية! "ميس نجلاء" كانت تحفظ القرآن وتمر علينا أثناء دروس القرآن بالمدرسة وتصلح لنا أخطاء التلاوة وهي تبتسم للشيخ ابتسامة لم أفهم مغزاها إلا وأنا أطالع خانة الديانة ببطاقتها. ميس نجلاء كانت توزع أطباق العاشوراء على المدرسة "عمايل ماما" هكذا كانت تقول.
المسيحيين المصريين ليسوا فقط أرثوذكس .. المسيحيين هم أستاذي عادل خزام الكاثوليكي الذي أبحث عن وجهه الدافىء كلما ذهبت للنادي.. هم توفيق الوحش الإنجيلي الذي أرسلت له رسالة بعد أربع سنوات من آخر لقاء لي به أدعوه لأولى أمسياتي الشعرية لأفاجأ وأنا على خشبة مسرح الساقية بصديقي العزيز توفيق يدخل متأخرا ويجلس مستمتعا حتى آخر الأمسية ليهنأني بتحقيق حلمي والسعادة تملأ وجهه البشوش كأنما حققت حلمه هو. المسيحيين هم زملائي السابقين ماهر وأسامة ورفيق وسماح شنودة ورامي اللي بيصلي عالنبي طول ماهو بيتكلم J المسيحيين هم مينا بولس الذي حذرني من كتابة هذا المقال خوفا علي من المتطرفين.
إن كان عهد مبارك قد أنسانا رفاق الوطن فلنعود بالذاكرة ونتذكر من هم الأقباط.
الكلمة مشتقة من أسطورة كتبها "هوميروس" اسمها "إجيبتوس" ومعناها الحرفي "التيس الخامل" وقبل أن تضحك أذكرك عزيزي القارىء أننا كلنا فعليا أقباط J فالأقباط هم أهل مصر ولكن بدخول العرب إلى مصر بدأ إسم الأقباط ينسلخ تدريجيا على المسيحيين المصريين. الأقباط حقا سلالة جينية فريدة حيث أنهم وإن تزاوجوا بشكل طفيف مع سلالات أخرى إلا أن هذا التزاوج لم  يكد يؤثر عليهم جينيا وكشفت رسومات الفيوم الأثرية أن أقباط مصر مازالوا يحتفظون بالسحنة المصرية القديمة "العيون الواسعة والحواجب اللي راكبة فوق بعض مثلا J"  الحقبة الأولى من الحكم الإسلامي لمصر شابها الكثير من الغموض وتواتر واختلاف الروايات في معاملة الحكام المسلمين للمسيحيين المصريين.. فتجد روايات عن "قيد الزي" وروايات مقابلة عن سماحة الإسلام تؤكد أن هذه الممارسات كانت تحدث مرة كل عشرون إلى أربعون عاما ويتم إلغاؤها فورا ..ولن أعرض لهذا أو ذاك لأنه ينكأ جرحا لم يكن لنا يد فيه..
هل تعرف أن تعداد المسيحيين في مصر يقدر ب 6 مليون مسيحي فقط! هل هذا العدد يسمح لنا أو لهم بالخوض في أساطير تقسيم الدولة وهيمنة المسيحيين؟ إنهم أقلية والأقلية بطبعها مستضعفه فوجب علينا أن نحميهم حماية الأخ الأقوى لأخيه الأضعف.. ويجب علينا أن نفخر بإنجازاتهم ونضمها لإنجازات الوطن.. هل تعرف أنه كما أن لدينا الأزهر الشريف لدينا أيضا مدرسة الإسكندرية "الكلية الإكليركية" حاليا والتي تخرج منها أساقفة عظام حتى أن العلامة "أوريجانوس" المعروف ب "أب اللاهوت" هو أحد خريجي هذه المدرسة.. هل تعرف شيئا عن آريوس الفتى الليبي الذي جاء ليدرس في مدرسة الإسكندرية ورُسِم كاهنا ثم اصطدم بالبابا ألكسندروس بابا الاسكندرية آنذاك حين أصر "آريوس" أن المسيح مخلوق وأن الروح القدس صنيعة الله.. ونتج عن هذا الصراع انتصار البابا وإصدار قانون نيقيه الذي تسير عليه كنائس العالم الحديث ومقتل آريوس بطريقة بشعة. "فرصة للنقاش اهي إجري امسك جارك المسيحي واتناقش معاه J"
ومرت الأيام.. ثم جاء محمد علي وبدأ عهد السماحة والمساواة الذي استمر حتى عهد الخديوي اسماعيل باشا الذي حصل الأقباط في عهده على الكثير من حوق المواطنة مثل تقلد القضاء والرتب.
لم أعرف أن نجيب الريحاني مسيحيا إلا بعد أن قرأت ذلك في أحد المواقع الالكترونية.. لم أعرف إن ماجد الكدواني مسيحي إلا من نفس الموقع الذي يعدد مشاهير الأقباط.. هاني رمزي وغيرهم من صانعي الضحكات الذين يمنحون أيامنا المصرية مذاقها الحِرِش. من منكم يعرف "إستر فهمي" الشابة التي راسلت الرئيس الأمريكي  "ويلسون" تطالبه بإخلاء سبيل سعد زغلول ورفاقه فكتبت " أرسلنا أربعة أشخاص للقتال في هذه المعركة - تعني سعد زغلول ورفاقه _ وإذا كانت هناك ضرورة ملحة سوف نرسل 400 وقد تصبح 4000 أو 4 ملايين لتحرير هؤلاء الأربعة ".
لن أحدثكم عن المواطنة وعن مدنية الدولة وقانون بناء دور العبادة الموحد.. لن أحدثكم عن قانون الطوارىء الذي يتم تمديده وتمريره عن طريق حرق الكنائس.. لن أسائلكم لماذا فقط كنائس الأرثوذكس "الأغلبية المسيحية في مصر" هي التي تستهدف دونا عن باقي الطوائف المسيحية في مصر رغم أن المواطن العادي لا يعرف الفرق بين كنيسة هذا وكنيسة ذاك.

أيها الإخوة المواطنون... تعارفوا فإن اللي ما يعرفك يجهلك على رأي خالتي بمبه. J


مفيش أمل

أضف تعليق11:37 ص, بواسطة المحروسة



مفيش أمل
طول مالهلال المعتبر
حاضن صليب نونو
وبيطبطب عليه
يبقى بصراحه بدون زعل
مافيش أمل

طول ماحنا لسه بنترسم
على صفحتين
إيدتين وماسكين العلم
ومادام بنقبل نتقسم
على فرقتين
يبقى الطبيعي هانتقسم
ومافيش أمل

وطول ما أمي ملبساني
السلسلة
والماشاءالله مدلدله
وملعلطه
والصليب بنكبره لما
الرقاب متحنطه
هاتدنها متلخبطه
ومافيش أمل

لأ فيه أمل
تنسى انت مين
وانا ابن مين
ونسُك عالماضي الحزين
وتحط كتفك جنب كتفي
واللي يفوت من بينا
يبقى مالهش ديّه
مالهش دين
ونبني بكره بسرعه قبل ما يقفلوا
باب النهار اللي انفتح
ونخض مع بعض الشبح
ونقول له عاو
الشعب لو
شاف خلقتك راح تندبح