ناعسة اللي صبرت زمان ع تلتميت نكسة ,,
جاها رئيس إخوان قالت له بلا وكسة ,,
ناعسة لا ع تولول ولا قاعدة تتشحتف ,,
لكن شافوها كتير .. وسطينا وبتهتف ,,
شدت له ناعسة جواب .. "ارحل ما تتهورش" ,,
"لو مش عارفني اياك .. ناعسة ما عتهزرش" ,,
تشاهد الأن جميع تدوينات شهر يونيو 2013. إظهار كافة الرسائل
الديكتاتور
الديكتاتور بيلف في الساقية ..
مربوط يا عيني وعينه معصوبة ..
والناس يا عيني بردو مش لاقية ..
في إيدها غير تحدف عليه طوبة ..
استسلام
أنا استسلمت ,,
مينفعش اني اعاند الدنيا دي لوحدي ,,
بجد فهمت ,,
وهتعلم أعيش أحلام على قدي ,,
سلام يا حلمنا الوردي ,,
أنا .. سلِّمت ,,
لسه عايش
أنا مت ييجي ألف مرة ولسه عايش ..
وغلبت ادوّر ع السبب ..
إزاي بحارب غول بسيف كارتون وبايش ..
وازاي ما متش م التعب!
ديل الدم
خليك في ديل الدم للآخر ,,
الدم عارف وش سفّاحه ,,
لا تقول فلول, إخوان ولا عساكر ,,
شوفلك شهيد و خُد وراه ساتر ,,
خليك في ديل الشهدا متشعبط ,,
الناس عبيطة وثورتك أعبط ,,
وحده الشهيد عارف طريق النور ,,
شوفلك شهيد واجري ورا جناحه ,,
بالونات حمرا
ألقاش معاكي صورة ليا زمان؟
قبل الهموم ما تعبِي تقاطيعي؟
ألقاش معاكي وصفة للحرمان؟
تقتل مشاعري وانتي بتضيعي؟
ألقاش في جيبك بالونات حمرا؟
وبونبوناية تحلّي أيامي؟
ألقاش في ملكك خُن يا سمرا؟
أتاوي فيه عشقك وأحلامي؟
ألقاش معاكي فكة للأيام؟
ألقاش معاكي حضن في الزحمة؟
ألقاش معاكي بوسة قبل ما انام؟
ألقاش معاكي حتتين لحمة؟
ألقاش معاكي لمة الأعياد؟
ألقاش معاكي صحبتي وأهلي؟
ألقاش معاكي فرحة الاولاد؟
ألقاش معاكي ضحكتي الأصلي؟
