ألقاش معاكي صورة ليا زمان؟
قبل الهموم ما تعبِي تقاطيعي؟
ألقاش معاكي وصفة للحرمان؟
تقتل مشاعري وانتي بتضيعي؟
ألقاش في جيبك بالونات حمرا؟
وبونبوناية تحلّي أيامي؟
ألقاش في ملكك خُن يا سمرا؟
أتاوي فيه عشقك وأحلامي؟
ألقاش معاكي فكة للأيام؟
ألقاش معاكي حضن في الزحمة؟
ألقاش معاكي بوسة قبل ما انام؟
ألقاش معاكي حتتين لحمة؟
ألقاش معاكي لمة الأعياد؟
ألقاش معاكي صحبتي وأهلي؟
ألقاش معاكي فرحة الاولاد؟
ألقاش معاكي ضحكتي الأصلي؟
هل تريد التعليق على التدوينة ؟