تشاهد الأن جميع تدوينات شهر فبراير 2013. إظهار كافة الرسائل

كلمتين ع الريق

أضف تعليق3:40 م, بواسطة المحروسة



ولدي هقول لك كلمتين ع الريق ,,
 مفيش فريق عاقل يذم فريق ,,
الذم بالجملة طريق الدم ,,
والدم بالجملة يا ولدي بريء ,,

ولدي هقول لك كلمتين م القلب ,,
لو ليك يا ولدي حاجة عند الكلب ,,
إياك تقول له يا سيدي ولّا يا عم ,,
الشهد من يَد اللئيم له الكبّ ,,

ولدي هقول لك كلمتين وسكوت ,,
ما تخافشي لا رصاصة ولا نبّوت ,,
وخاف يا ولدي كلمة زي السم ,,
بالكلمة نحيا وبالكلام بنموت ,,

ولدي هقول لك كلمتين واتِّكِل ,,
سيب الشيطان ويا الشيطان يصطفل ,,
محناش يا ولدي الحيلة ناقصين غم ,,
وان كان لابد, أنزل أنا واتقتل ,,

عمَر

أضف تعليق10:46 ص, بواسطة المحروسة

عمر ,, 
تلات حروف زي سما ,,
تلات حروف زي فجر ,,
تلات حروف زي غُنا ,,
تلات حروف زي صبر ,,

عمر ,,
تلات حروف زي بيت ,,
تلات حروف زي أهل ,,
تلات حروف زي زيت ,,
تلات حروف زي جهل ,,
تلات حروف زي غيط ,,
تلات حروف زي نمل ,,


عمر ,,
تلات حروف زي قلم ,,
 تلات حروف زي عِلم ,,
تلات حروف زي علَم ,,
تلات حروف زي حلم ,,
تلات حروف زي ألم ,,
تلات حروف زي إثم ,,


عمر ,,
تلات حروف زي ضنا ,,
تلات حروف زي "شهْد", 
تلات حروف زي "هَنا", 
تلات حروف زي "وَعْد", 
تلات حروف زي "جَنا", 
تلات حروف زي بعض ..

عمر ,,
تلات حروف زي بشر ,,
تلات حروف زي أرض ,,
تلات حروف زي شجر ,, 
تلات حروف زي فرض ,, 
تلات حروف زي قطَر ,, 
تلات حروف زي قرض ,,

عمر ,, 
تلات حروف زي جيب ,, 
تلات حروف زي قرش ,, 
تلات حروف زي ديب ,, 
تلات حروف زي كِرش ,,

عمر ,, 
تلات حروف زي شَبَع ,, 
تلات حروف زي جوع ,, 
تلات حروف زي سَمَع ,, 
تلات حروف زي طُوع ,,

عمر ,, 
تلات حروف زي "بنّا" ,,
 تلات حروف زي "قُطب" ,, 
تلات حروف زي "حنّا" ,, 
تلات حروف زي "بوب" ,,

عمر ,, 
تلات حروف زي قطن ,, 
تلات حروف زي شاش ,, 
تلات حروف زي حُضن ,,
تلات حروف زي باش ,, 
عمر ,,
تلات حروف زي مات ,,
تلات حروف بس عاش ,,

عمر,,
تلات حروف زي قدَر,
تلات حروف زي قهر,,
عمر ,, 
تلات حروف زي "مصر".






عمر ,, بياع البطاطا

أضف تعليق10:10 ص, بواسطة المحروسة

وبمنتهى البساطة 
 قتلوا بتاع البطاطا 

 قال لك وصلة مزاح 
كركر سن السلاح 
دخلت قلب الصغيّر 
الطلقات اعتباطا 
 بمنتهى البساطة!

وبمنتهى النطاعة
والواد سايح في دمه
قنديل كل اللي همه
يدي دروس في الرضاعة

وبمنتهى البرود 
قال لك غلطة جنود
 تغور كل العساكر
يغور كل البارود

وبمنتهى الهدوء
طلع عادي الشروق
شهيد بيجر شهدا
كتروا اخواتنا اللي فوق

إني رأيت كمان

أضف تعليق11:01 ص, بواسطة المحروسة

طلعوا علينا بوِشُّهم مكشوف ,,
 ريحتنا خل وخلهم مولوتوف ,,
والثورة في المونتاج .. مترنحة ودايخة ,,
 والدم مش مكياج .. ده لون الخوف ,,

أكشن و رول ركزلي ع المجاميع ,,
أكشن و زوم على ضيفة ويا مذيع ,,
كل المشاهد متكررة وماسخة ,,
كل القلوب وسخة فسيناريو بديع ,, 


طلع علينا فآخر المشهد ,,
شمشون وحالف يهدم المعبد ,,
وديدمونة مكرمشة وشايخة ,, 
وهرقل شايل خالتك ام احمد ,,

والتتر نازل روحوا العشاق ,,
البطلة مسحت دمعتين وزواق ,,
مسحوا العساكر رسمتي البايخة ,, 
وحده البطل هو اللي عمره ما فاق ,, 

****
إني رأيت اليوم الصورة من جوه ,,
ناصر صلاح الدين .. بيحاصر الميادين ,,
ويبيع صكوك حطين .. لاصحابه ع القهوة ,,

إني رأيت اليوم فيما يرى الشعرا ,,
صفين من النياشين.. على طرحة العدرا ,,
وقبة طوب خضرا.. على قصر راس التين,,
وعباية المهدي.. وارد بلاد برة ,,

إني رأيت اليوم الخضرا بتناغش ,,
وبتتكسي غوايش ,,
وابن الهلالي ابو زيد ,, بيبيعها للواغش ,,
إني رأيت اليوم .. خَدّ الحسين بايش ,,

*الصورة لقصيدة الرائع مصطفى إبراهيم التي ألهمتني هذا الرد


عيانة

أضف تعليق3:30 ص, بواسطة المحروسة



عيانة لدرجة مش قادرة أكتب ولا ارد,,
وعنيا الحمرا المنفوخة منظرها يخض,,
 والشغل متلتل متأجل وانا لازم اصد,,
 عيانة بجد ومش قادرة ادعولي لابُد,,

البرد مكلبش في مفاصلي ,,
 برد من الفاجر م الأصلي ,, 
مين اللي ما سمّى وبصبصلي؟
 البراذرهود؟

سطل اللمون جابش عمايله
والجنزبيل أثبت فشله
الطب فينه وفين أهله؟
قرِّبت أعض!

قال لك ده إيه نقص مناعة ,,
 ومفيش دوا أدام فيه رضاعة ,,
 قضّيها بأه طِب خزاعة ,,
شوربة كوارع أو هُدهد!