كلمتين ع الريق

أضف تعليق3:40 م, بواسطة المحروسة



ولدي هقول لك كلمتين ع الريق ,,
 مفيش فريق عاقل يذم فريق ,,
الذم بالجملة طريق الدم ,,
والدم بالجملة يا ولدي بريء ,,

ولدي هقول لك كلمتين م القلب ,,
لو ليك يا ولدي حاجة عند الكلب ,,
إياك تقول له يا سيدي ولّا يا عم ,,
الشهد من يَد اللئيم له الكبّ ,,

ولدي هقول لك كلمتين وسكوت ,,
ما تخافشي لا رصاصة ولا نبّوت ,,
وخاف يا ولدي كلمة زي السم ,,
بالكلمة نحيا وبالكلام بنموت ,,

ولدي هقول لك كلمتين واتِّكِل ,,
سيب الشيطان ويا الشيطان يصطفل ,,
محناش يا ولدي الحيلة ناقصين غم ,,
وان كان لابد, أنزل أنا واتقتل ,,

تحرير الرسالة…

هل تريد التعليق على التدوينة ؟