أنا بتنفس حرية
لأول مرة فعمري بجد
شايل علمك فإديه
وماشي خلاص فطريق المجد
أنا بتنفس حرية ومش هاتنازل ولا هاتهد
دانا دبة رجلي فأرضك
يوم ورا يوم بتهد السد
أنا بتنفس حرية
ونازل ماشي فعز البرد
كنا 2 و3 و100
وفجأة بقينا نفوق العد
وبقيت وسط بشر من دمك
واقف بهتف ليكي وبِاسمك
واقع رافع راية حلمك
بتشاهد وانا شايل همك
هتكملي من بعدي يا بلدي
والا الليل في عبايته يلِمِّك
آااااه...
تعبت.. بردت.. ونِمت شوية
جم غطوني الخلق بعَلمك
صحيت على زفه
وعالم واقفه
كبار وصغار وعيال في اللفه
وشفتك بينهم مستنيه
وفاتحه دراعك.. رُحت بلهفة
نازل قبري كإني باضمك
آااااه يامّايا...
حضنك احن من امي عليه
أنا بتنفس حرية
وشايف جوه عنيكي بشاير
أحلام خضرا طرح يناير
بتفَتَّح للشمس ستاير
شايفك يا ام الدنيا صبية
وبتتنفس حرية
هل تريد التعليق على التدوينة ؟