بصوا بأه مالآخر مصر لاعمرها هاتبقى علمانيه ولا ينفع تبقى وهابية... فا الإخوة السلفيين يهدوا أعصابهم كده لا دقونهم قربت تقع من التشنج... والإخوة الليبراليين برضوا يا ريت نبطل قرقضه فضوافر اللي جنبنا..
بالبلدي كده مصر صينية مسقعه بالبشاميل.... الإسلاميين في مصر هم البتنجان بصراحه مع حفظ الألقاب.. والليبراليين هم الباشاميل الطِعِم الشيك اللي عالوش... والمواطن العادي البسيط هو اللحمه المخلوطة بالبتنجان.. هو البروتين اللي فيه المفيد.
اللي يفكر ياكل مصر ممكن بسهولة يشيل الوش اللي فوق على جنب وتفضل مصر وجبة طعمه بس هاتفقد الكثير من ثراءها الذي يميزها.
انما اللي يحاول يشيل البتنجان على جنب هايبوظ الأكله ومش هايفضل له حاجه ياكلها
انما اللي يحاول يشيل البتنجان على جنب هايبوظ الأكله ومش هايفضل له حاجه ياكلها
والأهم بقى اللي يحاول يفصل اللحمة المفرومة عن البتنجان هايتعب قوي وهايفشل في الآخر. :))
فا اللي عايز ياكل مصر ياكلها على بعضها وما يقولش يععع...
ملحوظة: الصورة اللي فوق دي صورة مصر وهي صغيرة اللي حفظت القرآن وكبرت اشتغلت أرتيست وصلت مصر للعالميه والإمام الغزالي كان بيحب يسمع غناها... مصر حرة ماحدش بيمليها تعمل إيه.. تغلط تصيب تنتقب تترهبن تقلع ملط وتجرسنا وسط الأمم.. هههههههه لا مش للدرجة دي الستر حلوة برضو :)))
هل تريد التعليق على التدوينة ؟