يا ام المخده تافتا بمبِي
اتمطعي يا مصر واتاوبي
واصحي من نِفس اللي عاشقك
مرة بدري
جاكي الربيع واحنا ف يناير
قومي بدلع من فَرشتِك
يا اللي تتلفي ف حراير
يا ام النَفَس ع الصبح عنبر
إلبسيني خُف أحمر
قد رِجلك
مادام بخاطري
أشيلها عنك خطوتك
ويلِد حِملِك
زقي الستاير
خلي نور الصبح يلمح طلّتِك
سيبي الهوا الطاير
يعاكس قُصتِك
ويحلّي أكتر مانتي حلوة
يا حلوة شكلك
يا مخلخله التيجان
ب دَق خلخالك
ومحيّره الخلان
إنتي مين خالك
ما تقولي انتي بأه
مين اللي يستاهلك
لفي الملايه
اتمخطري على شط نيلك
وشاوري للشمسايه
تتسربع تجيلك
وانتي على
أقل.. أقل من مهلك
حِلّي الضفاير
وانفضي عنها القلق
وخلي بالك م الحلَق
داحنا يا مصر معلقين
حلم السنين
حلقه ف ودانِك
اتوضي يا مصلية
من مية عنيَّه
وعمّدي بيها الميدان
وارفعي الصوت ب الأدان
يسلم أدانك
ريحي ع السور شويه
واسمعي
اسمعي نكت العيال الملهَمة
واستمتعي
واطلقي الضحكه حمام يملا السما
اضحكي م القلب لما تدمعي
ده الضحكه ليها زمان والله بتشتاقلك
وابدري النيل ب الصواري
وافردي الشال ع النجيله
ورَوَّقي
وغني غنوة للعصاري
تبهج النفس العليلة
اتزوقي
وحَنّي شعرك من دمايا
وسبِّلي
ده النني وسع النيل دوايا
اتكحلي
وقلبي كتاب الضماير للنهاية
وغربلي
غربلي الناس والنوايا
وميِّلي
وشوشي النيل الحكايه
وانتي بتستني الشفق
وشوفي صورتك المعكوسة
في الميه المرايا
هتشوفي أجمل ما خَلَق
هتشوفي أهلِك
تعليق واحد على { دلع }
27 مايو 2012 في 4:43 ص [حذف]
تستحق الدلع
هل تريد التعليق على التدوينة ؟