حِلقان ودلّايه

تعليق واحد8:06 م, بواسطة المحروسة

يا مصر يا ام القدر على الجبين آية
لابسه النجوم والقمر حلقان ودلّاية
والنيل بيسقي البشر عسلك بلا نهاية
هحكي الغرام للحجَر أصل انتي نساية

يا مصر يا اللي الوجود نايم على كفِّك
جه الفقر زي الدود كل طرحتك كشَفِك
ماحلا العيون السود والدمع بيناكفك
وربنا المعبود يا حلوة مانا كاسفِك

يا مصر قلبي انكوى واقف على بابك
أنا اللي جابني الهوى والا الهوا جابِك
حَب الفؤاد استوى مفروط على اعتابك
يا محيّره مِن غوى ما تفسري كتابك

يا مصر يا ام العيال يقطعلكيش عادة
يا ماريّه محمية ب سبحة وسجادة
أنا حبّة في الخلخال اتمخطري زيادة
عشقك يا مصر حلال والموت فيكي عبادة

يا مصر يا اللي البحور بتعوم على عومك
الشرق قام منطور على صوت أدان قومك
عرش البعيد مسجور قايم على قومك
واللي عليه الدور يبكي زمان نومِك

يا مصر يا ام العيون وسع السما واجمل
نزل المطر مجنون على الخدود يسأل
لقى القمر مسجون أكتر من الأوَّل
قال الزمن هُوّاه بس العيال أرجل

تحرير الرسالة…

تعليق واحد على { حِلقان ودلّايه }

islam hafez يقول...
31 ديسمبر، 2011 5:20 ص [حذف]

رائعة

هل تريد التعليق على التدوينة ؟