في بيتنا جثة

أضف تعليق5:14 ص, بواسطة المحروسة

هي: أنت قتلته!
هو في برود مستفز: لا بل أنت قتلتيه
هي: سنظل نتبادل الاتهامات ونترك جثته ملقاة هكذا؟
هو: عندك حق يجب أن نخفيها قبل أن براها الأولاد؟
هي: أوتظن أنهم لا يعرفون
أو لم يلاحظوا غيابه
أو لم يسمعوا صراخه
حتى الجيران عرفوا
أهلي في آخر البلاد عرفوا
انا فقط أريد أن نتخلص من الجثة حتى لا يظل شبحه يطاردنا هكذا
إكرام الميت دفنه يا أخي
ده أنا ساعات بانسى انه ميت
هو:وانا كمان ساعات بنسى
تفتكري ممكن يكون لسه عايش؟
هي: عايش ازاي يعني ماهو مات على إديك
هو:بس احنا ما حاولناش نسعفه ولا وديناه مستشفى
تفتكري ممكن يكون في غيبوبة؟
هي: مش عارفه... كل حاجه بتقول انه مات وشبع موت.. وبعدين مش انت اللي رفضت توديه مستشفى خوفا من الفضائح.. جاي دلوقتي تقول لي ما أسعفناهوش وتأنبلي ضميري!
هو: أصلي بصراحه من ساعة ما مات وانا مش عارف افتكرله حاجه وحشة
مش عارف حتى قتلته ليه
هي : شفت اديك اعترفت انك قتلته!
هو: زي مانتي ما بتتغيريش.. انا قصدي مش عارف مات ليه
بصي لوشه... زي الملاك
مش ممكن يكون ميت
ده مرمي هنا بقاله اكتر من سنة وشكله ماتغيرش
هي: ماهو مش ممكن يكون في غيبوبة برضو ولسه عايش..ده بقاله سنه واكتر من غير لا أكل ولا شرب
هو: طاب والحل؟
هي: ريح نفسك وروح طلعله شهادة وفاة وتصريح دفن ..
هو: ببساطه كده؟!
هي: سبحان الله هو انت تقتل القتيل وتمشي فجنازته!
هو:انتي قليلة الادب!
هي:انت عاوز ايه؟ عاوزني اسعفه وافضل امرّض فيه سنة عشان اشوفك وانت بتقتله تاني؟!
عاوزني اقوللك انا اللي قتلته!
تفرق ايه... اهو مات وارتاح!
عاوزني اقولك آسفه...آسفه يا سيدي بس شيله وخلصنا!

وفجأة ينتفض الجثمان واقفا ناقلا بصره بينهما باحتقار ثم يغادر الغرفة صافقا الباب خلفه

هو:طاب خلاص بطلي غلبه وقومي حضري الغدا


تحرير الرسالة…

هل تريد التعليق على التدوينة ؟