إنزل

3 تعليق3:59 ص, بواسطة المحروسة


إنزل عشان سلمية قتلوها
صفُّوا عيون كل الحمام لابْيَض
أم الشهيد ع الأرض سحلوها
والجرحى قالوا تموت ارخص ما تتمرض 

إنزل عشان الشهدا في الميدان
راجعه وبتهتف وسط أهاليها
يسقط نظام العسكر السجان
كتير على ثورتنا نحميها؟ 

إنزل عشان مالك عينيه تنوَّر
سامبو وكل السجنا تتحرر
تكبر ولادك في بلدنا الحُر
أم الشهيد تسمع خبر ب يسُر
إنزل عشان الدم بيطَهّر

إنزل عشان صوت الأدان يترفَع
إنزل عشان إيد الشيطان تتقطَع
إنزل عشان العدرا صوتها حرير
بيغني للي جَيّ ع التحرير
إنزل عشان قلب الشهيد اتوجَع

إنزل عشان كف التاريخ ع الورق
دفتر حضور الشعب في الميدان
والناس أسامي جدع يا إما جبان
يمكن تلاقي إسمَك انتَ فرَقْ

إنزل كإنك رايح الجنة
إنزل كإنك طالع الملكوت
إنزل يا مصري إلهي تتهنَّى
الجُبن عمرُه ما زق ساعة موت


لما الميدان يتملِي
الشهدا ب تكَبَّر
قومي يا مصر انزلي
شعبك عفِي ويِقْدَر

مدد يا خالق عيسى ومحمد
عايزين ملايكة شداد تقوينا
عندك جنود لا تنام ولا تهمد
ابعتلنا جندك تسير بينا

مدد يا رب العزة يا جبار
إحمي يا رب الثورة والثوار
تنزل نيرانهم برد
يطلع هتافنا نااااااااااار

صوت الهتاف معجزة
صوت الهتاف عصافير
اتعلِّمِت لِارصِفَة
تقف معاه وتطير

صوت الهتاف أوليا
قاد القلوب فوانيس
يا دولِة الأنبيا
قومي اطردي الأباليس

انزل بجاه النبي بغلاوة العدرا
انزل يا صفط اللبن
ما تقومي يا شبرا
شي الله يا سيدة
يا ام العِتاب طاهرة
انزل يا مصري بأه!
 وكَمِّل الثورة!

تعديل الرسالة…

3 تعليق على { إنزل }

Ismail Mohamed يقول...
21 يناير 2012 في 9:50 م [حذف]

انا حطبعها بكرة ان شاء الله وحوزعها في سان ستيفانوا مول بنفسي ان شاء الله .. ايه رأيك بجى ؟

محمد عبدالجواد يقول...
28 أبريل 2012 في 5:27 م [حذف]

جميلة جدا

محمد عبدالجواد يقول...
28 أبريل 2012 في 5:29 م [حذف]

جميلة جدا

هل تريد التعليق على التدوينة ؟