بلد الباله

8 تعليق8:53 ص, بواسطة المحروسة
يا مين يوديني أطل ع المينا ~ يا مين يمشيني على رملها الطينه ~ يا مين يصورني ~ وانا واقفه برسمها ~ ولّا بترسمني؟ ~ مش عارفه مين فينا 
اللي ما راحش بورسعيد وقعد ف بيتزا بينو ع الرصيف ياكل بيتزا سيمون فوميه ويحلي بفخفخينا يبقى ما راحش حته.. واللي ما سهرش على شطها ما شافش سهر. 
لو زرت بورسعيد اشتري من فرن الزيدي بجنيه عيش واطلع ع المعديه خدلك لفتين قبل المغرب بساعه.. ارمي قطع الخبز للنوارس وقضي أحلى ساعة فحياتك. ‎:)‏ النوارس بتتلم على كسرات الخبز وتبتدي تنادي بعض لما تبقى بالمئات.وتفضل ماشيه ورا المعديه مستنياك تحدفلها تاني.ومش بيسيبوا فتفوته تلوث القناة. 
في المعديه كان فيه بياع سكر نبات بيمشي ينادي بأسلوب مميز جدا.. الصين مفهاش سكر نبات.. فرنسا مفهاش سكر نبات.. بورسعيد بس اللي فيها سكر نبات. 
من وانا طفله بسمعه كل ما نركب المعديه عشان نروح نادي التنس.. لما كبرت اكتشفت ان سكر النبات اللي بيبعه صيني. ‎:)‏) بس الصين مفهاش سكر نبات!  ‎‎:)‏ 
بورسعيد المدينة الوحيدة اللي بتحترم الستات اللي بتسوق.. الست تسوق غلط والرجاله توسعلها عشان لما مراتاتهم تسوق غلط الناس توسعلهم ‎:)‏) 
البنت فبورسعيد تعدي الشارع من أي مكان وزمان.. والعربيات عليها إنها تفرمل وتبوظ الكاوتش والسائق يبتسملها كمان عشان أكيد صوت الفرامل خضها. ‎:)‏ 
ناس بتقول لي لا دول اتغيروا.. أزعل قوي بجد لو كان ده حصل.. أجمل فيكي يا بورسعيد دلعك للبنات.
أجمل ما في بورسعيد أنها مدينة صغيرة بها كل ما تريده من المدن الكبيرة. 
في بورسعيد التاكسيات طول عمرها نضيفه جدا.. هيونداي آخر موديل والتكييف شغال في الصيف عشان السواق ما بيبخلش على نفسه. وأجدع مشوار بتلاته جنيه. 
ولو انت من برة بورسعيد . . . الناس بتوصفلك المكان اللى انت عايز تروحة مش بيتوهوك 
اللي ما شافش بورسعيد بعيني يروح يشوفها بعينه.. ولو لقاها اتغيرت ما يجيش يقول لي.. هفضل اشوفها زي ما كانت.. أراها بعين العاشق لا عين الواقع. 
بورسعيد في الأعياد وهمية.. أكتر شعب بيعرف يفرح ويحتفل.. البلد كلها في الشارع.. ومفيش عنطزه ولا قنعره.. كله راكب حمير..حتى اللي عنده بي إم ..راكن البي إم ومأجر حمار. 
وتلاقي رجل أعمال ألاجه واخد أحفاده يركبهم الكاريته ويتحايلوا عليه يقوم مزود العربجي وواخدها سايقها بنفسه عشان يتبسطوا بجدهم الفارس! ‎:)‏ 
وفي العيد تلاقي أفخم شوارع بورسعيد"الجمهورية".. الحمير والحصنه بتتسابق فيه وراكبها شباب الضحك هيوقعهم من فوقها. فقرا على مليونيرات. ‎:)‏) 
في بورسعيد الغني والفقير بيعرفوا يتبسطوا..مع بعض..فنفس الأماكن..ده أحلى ما فيها..البحر بيخلي محدش يبات جعان.. والشبع بيملا العين ويطيِّب النفوس.

وآه ع البيوت الخشب فكسرى وفبورفؤاد.. كل عمارة قديمة حدوته.. كل شباك حكايه.. شبابيك تعلمك تمشي رافع راسك فوق عشان ما يفوتكش جمال تفاصيلها.

بيوت بورسعيد


كان نفسي اقول لكو روحوا بورسعيد في شم النسيم اتفرجوا على الكرنفال المصري الأوحد.. بس الغاز الطبيعي منع أجمل معالمه..هحكيلكو ذكرياتي أنا عنه. 
شم النسيم كان ذكرى فبورسعيد لاختطاف اللورد لمبي على يد الفدائيين وتوعدهم بحرقه إن لم يسلمهم الانجليز رفاقهم المحبوسين.. الانجليز وافقوا. 
الفدائيين سلموا اللورد لمبي واستلموا زمايلهم وعملوا عروسه قطن للورد لمبي وحرقوها.. ومن يومها بقت عادة سنوية. 
ليلة شم النسيم كل بيت فبورسعيد بيعمل عروسه لأي شخصية مضايقاه ويحرقها بالليل في أكبر كرنفال حرائق ممكن تتصوروه..تحت كل بيت حريق ضخم محدود بالطوب. 
الظاهرة تطورت وبقت الناس تعمل عرايس على شكل لاعبي الفرق التي هزمت فريقهم.. عرايس على شكل حماتهم ‎:)‏ مديرهم ‎‎:)‏‏ حرايق بارتفاع أربع طوابق! 
وكان فيه أغاني مخصوصة لليلة شم النسيم "يا حليلة يا حليلة~هنروح القسم الليلة" وأغنيات أخرى كثيرة. وطبعا خضير البورسعيدي كان له طقوس خاصة. 
خضير الخطاط كان بيعمل مسرح عرائس لمبي يمثل الوضع السياسي كل عام.. عرايس للزعماء العرب والأجانب.. ونهتف ونحرقها بالليل. ‎:)‏) 
آه نسيت اقول لكو.. كل بيت بيعمل عروسة بيفضل معلقها ع الشباك من بره كام يوم قبل شم النسيم عشان يباهي الناس بجمالها ويعلن كمان كرهه لمن تصوِر. 
تاني يوم الصبح اللي هو يوم شم النسيم.. بنقعد نلون البيض وناكل منجأونه "بريوش" من عند جيانولا.. والعصر نتغدى فسيخ مع كوب شاي منعنع ‎:)‏

شوارع بورسعيد واسعه ومتخططه بشكل رائع.. شوارع طويلة جدا متعامده على بعضها.. تقف فأي شارع وتبص قدامك ما تعرفش تشوف آخره.. مش متاهات المدن العشوائية اللي الواحد بيشوفها في مدن تانيه.
شوارع بورسعيد تحفها أشجار البونسيانا الملكية الرائعه.... البونسيانا شجرة وارفة الظلال يتغير لون زهورها بتغير الفصول.. نفس الشجره تكتسي بالأحمر الدموي والبنفسجي الدافىء وأحيانا الزهري الخجول.. الشجر عمره فوق ال 100 عام على جانبي الطريق.. تمتد فروعه حتى تكاد تلتقي وتلقي بظلالها على طول الشارع. الشارع النظيف.

شارع التجاري من معالم بورسعيد.. شارع شعبي تملأه البضائع المستورده من كل صنف ولون.. أكثر ما أعجبني في هذا الشارع هو وطنية نداءات الباعة.. من أشهر أغاني التجاري أغنية "شجع بلدك"
شجع بلدك.. بورسعيد.. بلدي وبلدك.. بورسعيد.. شبشب زيكو.. فبورسعيد .. ليه وليكو.. بورسعيد.. والانتربول.. بورسعيد
شجع بلدك.. بور سعيد.. بلدي و بلدك ..بورسعيد ..شبشب حمام . بور سعيد قربي يا مدام ..بور سعيد ..عروض العيد..بور سعيد
انظر كم مرة ذكر بضاعته وكم مرة ذكر مدينته؟ بائع ده ولّا هتّيف

رمضان في بورسعيد خاص جدا.. لم أر مثيله في مصر.. قبل الإفطار الشوارع هادئة جدا.. ولعب الكرة قبل الإفطار مقدس.. الإفطار يجمع الأسر ولكن السحور هو ما يميز بورسعيد.. السحور في بورسعيد وليمة لها طقوس خاصة.. الخبز المضفر عادة لها قدسية والرجل الذي يفشل في اقتناص آخر أقراص الخبز المضفر ويعود إلى بيته بأي نوع آخر من الخبز يبدو وكأنه انهزم في معركة.
الفول أساسي في السحور والزبادي القشطه الذي تتنافس محلات الألبان في تجويده خلال الشهر الكريم.. جيانولا أحد أشهر وأعرق مطاعم بورسعيد يتخصص في إعداد علب الفول الجاهزة لراغبي المذاق المتميز وبأسعار عادية جدا. الخبز دوما يأتي من سان جورج أعرق مخابز المدينه وإن كان جيانولا بدأ ينافسه بقوة مؤخرا.
رمضان في بورسعيد.. المساجد كلها بتتزين كإنها ففرح

التراويح في بورسعيد رائعة.. مسجد الرحمة به أعذب القراء صوتا.. المسجد التوفيقي به أكبر تجمع للمصلين.. يفيض المسجد حتى تمتلىء الشوارع المحيطة. 
البورسعيدية أهل تقاليع الصراحة.. وكل سنة يطلعوا تقليعه جديدة في زينة رمضان.. رمضان اللي فات رحت لقيت ماما وخالتي قالبين البيت خيمة رمضانيه! طبليه وقُله ومفارش رمضانيه خاصة!
مهما وصفتلكو البورسعيدية بيزوقوا البلد وبيوتهم في رمضان ازاي مش هعرف.. شوفوا الفيديو


واحنا صغيرين كان بطول شارع البحر شاليهات.. وكانت المحافظة بتقفل شارع البحر بالليل عشان الأطفال والناس يتمشوا ويلعبوا براحتهم.. شفتو دلع كده؟ 
بورسعيد كان فيها حارة في الشوارع للدراجات.. نروح المدارس بالعجل في أمان تام.. وبعد الضهر نروح النادي بالباتيناج! شفتو طفولة كده فمصر؟الدراجات وسيلة انتقال شهيرة جدا في بورسعيد لطلبة المدارس وموظفي الحكومة بوجه خاص..كل يوم الساعه 4 العصر عمال هيئة قناة السويس بيخرجوا كلهم فلحظة واحدة من الشغل يركبوا العجل وينطلقوا كلهم باتجاه بيوت الهيئة في مشهد رائع كإنه ماراثون عجل يومي.
للأسف المحافظين الجدد أصبحوا يأتون من خارج المدينة ولم يفهموا تراث الدراجات وأهميته لمنع الازدحام وللبيئة فقاموا بإلغاء حارة الدراجات.. أتمنى أن يتغير هذا قريبا وتعود لنا حارة الدراجات ذات الخط الأصفر يسار الطريق.

أحلى ما في بورسعيد انك ينفع تتفسح حتى لو مفلس.. اركب مع اصحابك المعديه ام دورين واطلع فوق في الصالون هتلاقي بنشات خشب لطيفه جدا وافضل رايح راجع في القناة والموج بيمرجحك واحكوا لما تخلصوا الحواديت.. رحلة بحرية.. ببلاش.
بلاج بورسعيد شغال 24 ساعة.. اطلع ع البلاج في الصيف هتلاقي شاشات عرض عملاقه بتعرض أفلام.. ومناطق تانيه هاديه مفيهاش زحام.. اختار اللي على ذوقك ذوقك وافرش ع الرمل واقضي أحلى سهرة في الدنيا.. حتى لو لوحدك هتنبسط.. برضو ببلاش إلا لو قررت تأجر كرسي وتشرب شاي ولّا تتعشى ممكن تصرفلك من خمسة لعشرين جنيه حسب ميزانيتك :)

الأكل في بورسعيد لذة لجميع الحواس.. تقدر في بورسعيد تخرج وتتعشى وتتبسط بأي ميزانيه.. من أول محلات الفول والطعميه زي "سرحان" و"التابعي" و"العيوطي" مرورا بعربيات التقاطيع الشهيرة زي "أبوظه" ومحلات الأسماك الشعبية زي "عم على" في البازار.. واستمرارا بعربات البيرجر الشهيرة التي تنافس السلاسل العالمية سعرا وجودة وأخيرا وليس آخرا مطاعم بورسعيد الراقية التي لا يعلى عليها.

الإفطار في بورسعيد يتركك حائرا أمام كم الخيارات فالمخبوزات في بورسعيد معبقه بخبرات متوارثه من أيام الفرنساويين والطلاينه.. بعد ما تدوق الكرواسون والباتيه في جيانولا هتحس ان اللي كنت فاكره كرواسون قبل كده ما هو إلا عيش فينو مُحَسَّن.
جيانولا كان خواجه مشهور جدا في بورسعيد .. المحل اتجدد وفقد مظهره العتيق للأسف ولكنه لم يفقد روعة مخبوزاته وأطعمته.. مخبز سان جورج له في قلوب البورسعيدية مكانه خاصة.. فقد ظل لسنوات يحتل الصدارة من حيث الجودة والسعر التنافسي.

اللي يروح مطعم البرج أو الكاستن أو أبو عصام يطلب على ضمانتي.. صينية موسى بالزبده ووقار مشوي على الفحم..وطاجن بطارخ مشكل وشوربة سي فود وحلة بكلويز.
اللي يروح لعم علي في البازار يجرب شوربة البكلاويز و السيبيا المقليه وام الخلول.
بورسعيد تشتهر بأفران خاصة لشي السمك بالرده.. مين ينسى السمك والكابوريا المشويه فى الفرن اللى تحت البيت.
في بورسعيد البكلويز بيتشرا صاحي من احواض سمك وتاخده البيت صاحي فكيس مليان مياه.. تنقعه يقوم يفضل يطلع التراب كله وتطبخه صاحي وبالهنا والشفا.. طزاجه لا يتخيلها إلا من ذاق حلاوتها.
وانت فبورسعيد اسأل على كوك دور -التقليد مش الاصلي- وخد من عنده توست بسطرمه أو رومي مدخن بالجبنة السايحه.. حلمات التذوق الخاصة بك ستنبهر .. وعد. :))

شاورما "جلال" في شارع الجمهورية لها نفس روعة مذاق شاورما "بو حيدر" في روكسي.. أتمنى يكونوا ما غيروش الخلطة.

الفطير الحادق في بورسعيد ينافس أفضل بيتزا تقدمها شوارع نابولي.. اسأل على مخبز حواوشي وخدلك فطيرة عليها أجود أنواع اللحوم والخضروات الطازجه.. وادعيلي وانت عينك بتدمَّع من السعاده بهذا الاكتشاف الثمين.

أكلت بالهنا والشفا؟ اطلع بأه على ديليسبس ورطب على قلبك بأجود أنواع العصائر.. عصيرالمانجو في بورسعيد أسطوره بس ما يمنعش تجرب كوكتيل "رضعة الأسد".. أنا ما جربتهاش بس يمكن انت تحب تجربها :))

رتب نفسك من النهارده تقضيلك يومين في بورسعيد في رمضان.. وخلي شم النسيم ده رحلة سنوية دائمة.. الأعياد حدوته لو تقدر ترتبها.
بورسعيد مدينة بتحب كل اللي يمشي على ترابها وكل اللي يمشي على ترابها يحبها.


ولو فضلت احكي عن بورسعيد لا الكلام هيخلص ولا الشوق هيقل.. أترككم مع هذه الصور 
بورسعيد مش أوروبا صورة أخرى




تحرير الرسالة…

8 تعليق على { بلد الباله }

ميـــــــرنــــــا يقول...
13 فبراير، 2012 9:37 ص [حذف]

مش عارفة اقولك ايه بجد..غير اني بعشقها البلد بنت اللذينة دي .. (:
و طريقة وصفك ليها بجد وهمية !
افتخر انك من بورسعيد فعلا :)

hamada066 يقول...
13 فبراير، 2012 10:26 ص [حذف]

انا شوفت واحد مش بورسعيدي معجب بالمقال على تويتر وبيقول مقال حببني في بورسعيد بالرغم من كل الهجوم اللي بتشهدة المدينة اليومين دول . بجد مقال اكتر من رائع

salah mohsen يقول...
13 فبراير، 2012 1:20 م [حذف]

يالله .....! 0_0
بجد كلام رائـــــــــــــع :)

justice يقول...
14 فبراير، 2012 11:23 ص [حذف]

ما أجمل بورسعيد و أهلها.

heba يقول...
14 فبراير، 2012 11:51 م [حذف]

جميل جدا .. بورسعيد مسقط رأس أمى ومرتع طفولتها وفجر صباها @darshia

alhedar يقول...
20 فبراير، 2012 8:30 ص [حذف]

بنتى العزيزه مروه
مفيش شك انك كالعاده وصفتى بورسعيد وصف المحب العاشق لكن دى بورسعيد اللى بيعرفها الشباب والناس اللى ياما راحت زارتها واشترت منها اجمل الاشياء ولكنك نسيتى جمال بورسعيد الحقيقى وفضلها على مصر كلها نسيتى التاريخ واللى عاوز يعرف يبحث عن الاسماء دى وعذرا لان دى طبعا مش كل الاسماء وانما من اسعفتنى بهم ذاكرتى ...فأنا أعتبر كل أهل بورسعيد فى هذه الفتره أبطال ((اطفال ونساء وبنات ورجال وسيوخ ))
ابحثوا عن الاسماء دى علشان تعرفوا بورسعيد الحقيقيه
1- فوزى ابو الطاهر
2- العميد يسرى عماره اللى ادى عساف ياجورى واسرائيل درس لن تنساه
3- طبعا الكابتن العظيم مسعد نور
وابطال التاريخ
1- احمد الرفاعى
2- السيده أم على (( فتحيه الأخرس ))
3- عبد السلام الجمل
4- حسن حمود
5- مصطفى كمال الصياد ******
6- منير موافى
من عاشق الاسكندريه الاكبر ...وعاشق بورسعيد برضه وعاشق تراب مصر كلها

Khaled gawish يقول...
4 مارس، 2012 2:41 ص [حذف]

انا روحت بورسعيد كتير بس بصراحة في حياتي ما كنت اتخيل ان حد يوصفها كده او يوصف حتي اي مدينه كده.... ياللروعه يا بخت بورسعيد باهلها لو كلهم زيك

mohamedalkaber يقول...
20 يوليو، 2015 3:40 م [حذف]

بورسعيد اعظم بلد فى الدنيا...

هل تريد التعليق على التدوينة ؟