لمّا الكون بينام انا بصْحَى
واما يضلِّم قلبي بيضْوِي
قلب الليل مفطوم ع الفرحة
حتى الديب مشتاق وبيعوي
ولحَدّ آخِر قهوة سهرانه
ولحد آخر رشفتين في الشاي
ولحد آخر نجمة حيرانه
ولحد آخر غنوتين في الناي
ولحد آخر سطر في الجورنال بتاع بُكره
ولحد آخر واد يبيع مناديل
ولحد آخر بنت ورا شباك ومش قادرة
تنام مآمنه للحبيب ع الليل
ولحد ما يْشُق النهار ع الفجر
ولحد آخر قطر
هسهر كما المواويل اغنِّي لمصر
يا مصر وانتي الغنوتين والعيِّلين
وانتي الغلابة الطيبين
وانتي الشباب المقهورين
وانتي المدى.. وانتي الجناح المنطِوي
يا مصر وانتي الزاده والزواد
وانتي اللي ع البال في البعاد
وانتي الحبيب وانتي الميعاد
وانا اللي جايلك مِشْتِهِي
يا مصر وانتي الحُضن والترحال
وانتي الجواب وانتي السؤال
وانتي الأكيد وانتي المحال
وانتي اللي آخِر سِكِّتِي
مولود انا فـ كَفِّك يا دوب
لو تِفْلِتيني هَنتِهِي
حُطِّيني على صِدرِك أدوب
واشرب لِحَد امّا ارتِوِي
أشرب لِحَد امّا ارتِوِي
تعليقان على { آخر قطر }
22 يوليو 2013 في 2:37 م [حذف]
اة الحلاوة دى والله روعه ربنا يزيدك ويلهمك بالخير ديما عظمه يا محروسه
23 يوليو 2013 في 6:33 ص [حذف]
لكل إنسان حق في اعتناق آراء دون مضايقة؛
لكل إنسان حق في حرية التعبير. ويشمل هذا الحق حريته في التماس مختلف ضروب المعلومات والأفكار وتلقيها ونقلها إلى آخرين دونما اعتبار للحدود، سواء على شكل مكتوب أو مطبوع أو في قالب فني أو بأية وسيلة أخرى يختارها
تحياتى MBLASHEN
هل تريد التعليق على التدوينة ؟