الإيد الشغالة

تعليقان12:13 ص, بواسطة المحروسة

تسلملي الإيد الشغاله
اللي بتغزل واللي بتنسج
اللي بتزرع واللي بتنتج
واللي بتطلع عالسقاله

يسلملي العمال في المينا
يسلملي اللي يحل ماكينة
الأمن السهران في كابينه
والكتف الصابرة الشيّالة
تسلملي الإيد الشغاله

يسلملي أطبِّتنا المهَرة
ولا افكر اسافر بالمرَّة
ده الحكما فبلدي فشر برَّة
ولا يستعصى عليهم حالة
تسلملي الإيد الشغاله

تسلملي دماغك يا مهندس
تسلملي دماغ اللي يدرِّس
تسلملي عيون اللي يغمس
بالملح ولا يعيشّي عواله
تسلملي الإيد الشغاله

يسلملي الفلاح والزرعه
تسلملي الفاس نازلة وطالعة
ده القمح ياناس درع وقلعة
وتهوني يا شمس القياله
تسلملي الإيد الشغاله

تسلملي عيون عم الاسطى
ماستناش تعيين ولا واسطه
عيّن نفسه وحطه يا بطه
بقى ريس اهو وعنده وكاله
تسلملي الإيد الشغاله

يسلملي اللي يبيع بالذمة
واللي يقلب رزقه بهمة
لو قرش حلال رزق ونعمة
واتفرج على رزق البالة
رجالة يا بلدي ورجالة
تسلملي الإيد الشغالة

تحرير الرسالة…

تعليقان على { الإيد الشغالة }

Amir Ismail يقول...
1 مايو، 2012 1:34 ص [حذف]

تسلملى الأيد اللى بتكتب
حروف تنور ضلمتنا
وتنور عقولنا وبصيرتنا
وتنادى على بكرة تعالى
تسلملى الأيد الشغالة

Amir Ismail يقول...
1 مايو، 2012 1:34 ص [حذف]

أزال المؤلف هذا التعليق.

هل تريد التعليق على التدوينة ؟