فرط الرمان

4 تعليق7:26 ص, بواسطة المحروسة

فرطتله الرمان فرط قلبي ولا جاني
غسلتله القفطان خرج بدري وخَلّاني

عصرتله جوافة وفردتله لحافَه ..
راح بات فحضن امه 
قشرتله التفاح وسبتله المفتاح ..
ولا حس على دمه!

خاصمتله اخوالي ولبستله الغالي ..
ولاف على غيري
قاطعت صحباتي وبعت دهباتي ..
مطمرش فيه خيري 

مليت بلاليصي ودهنت مقاصيصي ..
بالمسك والعنبر
دعكتله كعابه .. خرج مع اصحابه ..
يسهر ويتمسخر

عملتله ال لِلّي ولبستله الـتُـلـّي ..
طلع النهار فاتني
يرحم يا واد عمي .. يوم جيت تبوس قدمي ..
وتعد في مفاتني

قالوا اربطيه بالواد .. جبت الولد والبت
قالوا الْكُمِيه بالزاد .. عجنت لمّن شِبت

ولّعتله شمعة .. وصُمتله جمعة ..
ودعيتله يهدالي
يهديك يا واد ليا, دنا خالصِة النية ..
والدنيا شهدالي

قسما برب الناس .. ما خلّى حيلتي نحاس ..
ولاجابلي يوم خلجة
واغزل برجل حمار .. واعمل ملايتي خمار ..
وامه تقول عرجة!

وحياة ما مررني .. وفعيدي كدّرني ..
لاخد العيال وامشي
وارميله هلاهيله .. يلف ورا ديله ..
ما يشوف سواد رمشي


لوما المعايرة حرام, يابو شبكة ربع جرام
وتقولي خالصيني!
شيّلتني همَّك, همِّيت ابيع خاتمك
طلع دهب صيني

لا تجيني ولا اضمك .. خليك فحضن امك ..
وحلال عليك مهري
وان شوفت يوم بعدي .. زي اللي كان عندي ..
تعا تف على قبري

إفرح يا واد باتعة .. فايتالك القلعة
وكمان شوار بتّي ,,
خُطّابي على إيدك .. هروح لسيد سيدك
وريني مين ستي ..




تحرير الرسالة…

4 تعليق على { فرط الرمان }

negm يقول...
2 نوفمبر، 2013 11:16 ص [حذف]

ايه يا مروة الابداع ده :)))
الله ينور بجد ،

Hatem Hassan يقول...
11 يناير، 2014 1:19 ص [حذف]

كلامي يمكن لابيودي ولا بيجيب
لكن قايله و رزقي بعلم الغيب
محروسة م العين ويكفي ربنا حارس
ويكتب لك في خيره نصيب

hesen elshorbagy يقول...
27 أبريل، 2014 5:00 م [حذف]

ماشاء الله جميلة جدا
مش عارف جبتى المفرادات دى منين وعرفتى المصطلحات دى ازاى، حقيقى رائعة

kamal eltallawy يقول...
14 مايو، 2014 4:57 م [حذف]

جميلة جدا يا مروة مفرداتها بسيطة ومعبرة بجد ربنا يكون فى عون اللى هاتبقى حماته ف يوم

هل تريد التعليق على التدوينة ؟