أنا شايلة قلبك

تعليقان8:28 م, بواسطة المحروسة



أنا شايلة قلبك جوه قلبي وبسمعه
بيقولي ع اللي عنيك بتضحك وتداريه
وعرفت منه حاجات تعلق قلبي بيه
وساعات بيحكي القى العيون بيدمّعوا

أنا شايلة قلبك جوه قلبي بدللـه
ينام فحضني ويحلا لعيوني السهر
وفعز برد الليل ومهما تكون مطر
تنزل دموعي تدفي قلبك تغسله

أنا شايلة قلبك جوه قلبي بهدهده
وبنيمه على صوت حناني ولهفتي
واللي انت سامعه الفجر ده مش غنوتي
ده صوت قلوبنا سهرانين يتودودوا

أنا شايلة قلبك جوه قلبي مدفياه
 بينام فحضني كإنه كان محروم هَنا
 مين اللي محظوظ فينا، انت ولا انا؟
 ولا احنا لاتنين اتكتب لينا النجاة؟

أنا شايلة قلبك جوه قلبي مخبياه 
من ناس كتير مش عارفة طيبته ومعدنه 
احتاروا فينا قالوا عشقوا اتجننوا
 وقلبي وقلبك سرهم سر الحياة

أنا شايلة قلبك جوه قلبي ببخره
لا يحسدوني الناس وعينهم تجرحه
يا رب كل الناس يحبوا ويفرحوا
ويسيبوا قلبك جوه قلبي ينوره

أنا شايلة قلبك جوه قلبي بعوِّدُه
 يركع ويسجد للي بالحب ابتلاه 
الصَّلا سجدٍةْ قلوب عاشْقَة الإله
 قلبي وقلبك مؤمنين بيوحّدوا

أنا شايلة قلبك جوه قلبي مصدقاه
 مهما يقولوا الناس عليه ويألفوا!
 انت الحقيقة وهم مهما يزيفوا .. 
بسيب كلامهم في الهوا ياخد مداه!

أنا شايله قلبك جوه قلبي بدلعه
واسقيه صنوف العشق والوان الغرام
وان كان حلال العشق ولّا يكون حرام
أكبر حرام ان القلوب يتوجّعوا

أنا شايلة قلبك جوه قلبي وماشية بيه
والناس تشوفني تبصلي نظرة عجب
ولا عرفوا إيه سر ابتسامي
ولا سر نظرات العتب 
أنا شايلة قلبك .. وانت إيه؟

تعديل الرسالة…

تعليقان على { أنا شايلة قلبك }

Unknown يقول...
22 أبريل 2014 في 9:30 ص [حذف]

جميلة أوي يا مروة :)

manar يقول...
24 نوفمبر 2020 في 3:42 ص [حذف]

هاند ميد
كهربائي فلل دبى
دهانات واصباغ واعمال ديكور دبي
صباغ في دبي

هل تريد التعليق على التدوينة ؟