.jpg)
الخيط اللي بيربط قلبي بقلبك
حبل حرير مجدول
شوق وحنين موصول
يوجع لما أعاتبك
الخيط اللي بيربط قلبي بقلبك
طرفه فكف الشمس
وبيرقص ع الهمس
الخيط اللي بيربط قلبي بقلبك
طرفه فقلب غمامة
تيجي بألف سلامة
الخيط اللي بيربط قلبي بقلبك
لو يتهز تطير
الأحلام عصافير
حبك زي المطرة الحلوة فعز الصيف
زي الشمس ما تطلع وسط الغيم تخاطيف
حبك جنة .. وانا على باب الجنة ضعيف
حبك زي سنابل قمح
زي الغيط في أوان الطرح
حبك زي العيش والملح
لطيف ..
زي المطرة فعز الصيف
حبك زي عيون الفجر
شلال عشق بيهدُر هدْر
حبك سر إلهي وأمر
ومش بالكيف
زي المطرة فعز الصيف
حبك زي خدود الورد
زي الجمعة وجرس الحد
حبك غيّر قلبي بجد
حب نضيف
زي المطرة فعز الصيف
والخيط اللي بيربط قلبي بقلبك
حامي وناعم زي السيف
هل تريد التعليق على التدوينة ؟